Kelmendi përgatitet që të mbyllë vitin si kampione evropiane

Prishtinë – Xhudistja kosovare Majlinda Kelmendi nuk ia doli të fitonte medalje në Lojërat Olimpike “Londra 2012”. Por Kelmendi ka gjasa që vitin 2012 ta mbyllë si kampione e një gare të nivelit të lartë.

Ajo nga 16 deri më 18 nëntor do të paraqitet në kampionatin evropian për xhudistët deri 23 vjet (U-23) që mbahet në Pragë të Çekisë. Evropiani do të jetë gara e fundit për Kelmendin në këtë vit.

Në Evropianin U-23 përveç Kelmendit do të paraqiten edhe tre xhudistë nga Kosova. Në kategorinë e Majlindës, atë 52 kg do të garojë edhe Distria Krasniqi, derisa Nora Gjakova do të garojë në kategorinë 57 kilogramë. Në Evropian për herë të parë do të paraqitet Korab Morina që do të garojë në kategorinë deri 66 kg.

Xhudistët kosovarë për Evropian janë duke u përgatitur në Slloveni.(koha)