Katër porosi të Albin Kurtit për mërgimtarët në Gjermani

Një delegacion i Lëvizjes Vetëvendosje, në të cilin ishin kreu i saj, Albin Kurti dhe deputeti Rexhep Selimi, organizoi dje një tubim përmbyllës të vizitës tetëditore në Zvicër dhe Gjermani.

Selimi falënderoi mërgatën, posaçërisht për kontributin e dhënë gjatë luftës, kurse pastaj foli edhe rreth emigrimit të rinisë në ditët e sotme. Si tha ai, VV-ja ka identifikuar problemet në Kosovë dhe ka plan të qartë për zgjidhjen e tyre, duke kritikuar njëkohësisht qeverinë për për mungesën e krijimit të kushteve për investime nga mërgata shqiptare.

Kurti, ndërkaq prezantoi alternativën qeverisëse të VV-së, duke porositur të pranishmit dhe mbarë komunitetin shqiptar në Gjermani që patjetër ta shfrytëzojë të drejtën e votimit, si ër zgjedhjet në Kosovë ashtu edhe ato në Gjermani.

Lideri i VV-së porositi gjithashtu që studentët të organizohen nëpër organizata studentore shqiptare, por edhe ato gjermane, pastaj që punëtorët të organizohen në sindikata, kurse punëdhënësit e ndërmarrësit shqiptarë të bashkëpunojnë, si dhe në fund që prindërit kursimet e tyre të mos i investojnë në shtëpi të mëdha, apo në vetura luksoze, por t’i shfrytëzojnë për arsimim sa më cilësor të fëmijëve të tyre, thuhet në komunikatën e VV-së.