Katër emra për Topin e Artë në Shqipëri

Federata Shqiptare e Futbollit bëhet gati për ndarjen e çmimeve të fundvitit në mbrëmjen Gala. Ashtu siç është bërë traditë prej vitesh, sonte në mbrëmje do të vendoset emri fitues i “Topit të Artë” Shqiptar, ose siç njihet ndryshe futbollisti më i mirë i vitit. Nga votat e marra nga trajnerët dhe kapitenët e skuadrave të Kategorisë Superiore, në garë për të fituar këtë trofe janë 4 futbollistë, që kanë bërë mirë gjatë këtij viti. Sipas burimeve nga FSHF, janë 4 futbollistë në garë për të fituar Topin e Artë. Daniel Xhafa i Teutës, Nuredin Orelesi dhe Gjergji Muzaka të Skënderbeut, si dhe Fatjon Sefa i Besës janë të nominuarit për të fituar çmimin e futbollistit më të mirë për vitin 2013.

Daniel Xhafaj ka shënuar në 10 gola sezonin e kaluar ndërsa në pjesën e parë të këtij viti është në krye së bashku me Bushic në kuotën e 9 golave. Veterani është treguar një nga lojtarët kryesor tek Teuta, e cila siguroi dhe pjesëmarrjen në Europa League sezonin e kaluar. Nuredin Orelesi nuk ka një imazh të mirë në shënimin e golave, por dueht thënë që 2013 ishte viti i tij, pasi tregoi se është një nga më të mirët e kampionatit Shqiptar.

Pjesë e rëndësishme në sukseset e Skënderbeut jo vetëm në kampionat por edhe në ecurinë europiane, Orelesi është konfirmuar edhe në pjesën e parë të sezonit aktual. Një tjetër futbollist i nominuar është Gjergji Muzaka, i cili vitin e ndan me dy fanella. Me Flamurtarin sezonin e kaluar, Muzaka ishte protagonist me 12 golat e shënuar duke u renditur si goleadori i tretë më i mirë edhe pse luan si mesfushor krahu.

Rikthimi në Korçë i ka ulur ritmin e golit duke qënë se deri më tani ka shënuar vetëm 3 herë, por krahu i dhjathtë i kampionëve tashmë duket i blinduar. Lojtari i fundit në garë është sulmuesi i Besës, Fatjon Sefa, që duket se ka rilindur në këtë sezon të dytë në Kavajë. 6 gola ka shënuar sezonin e kaluar me verdhezinjtë sulmuesi Lushnjar, një kuotë që është arritur në këtë pjesë të parë të sezonit. Golat e tij këtë sezon kanë qenë të rëndësishëm për Besën pasi i ka dhënë pikë skuadrës, duke u votuar në listën për Topin e Artë.(supersport.al)