Kastrati: Vitin 2020 po e përmbyllim me 83% shpenzim të buxhetit për investime kapitale

Kamenicë – Komuna e Kamenicës ka arritur që për vitin 2020 ta shpenzoj buxhetin për investime kapitale me 83% realizueshmëri.

Kryetari Qëndron Kastrati duke falënderuar kabinetin qeverisës, drejtoritë e njësitë komunale, menaxherët e mbikëqyrësit e kontratave për punën e bërë, ka thënë se është përmbushur përqindje e lartë krahasuar me qeverisjet paraprake.

“I lumtur që edhe vitin 2020 po e përmbyllim me rezultat tejet të mirë në shpenzimin e buxhetit për investime kapitale. Me 83% realizueshmëri! Për dy vite radhazi, kemi përmbushur përqindje të lartë krahasuar me qeverisjet paraprake dhe për këtë u jam falënderues kabinetit tim qeverisës, drejtorive e njësive përbrenda komunës, si dhe gjithë menaxherët e mbikëqyrësit e kontratave! Vazhdojmë të punojmë për qytetarët me përkushtim, me të njëjtën energji edhe për vitin 2021. Urime!”, është shprehur ai.

Kujtojmë që për vitin 2019, Komuna e Kamenicës kishte shpenzuar buxhetin për investime kapitale me 82% realizueshmëri, gjë kjo e cila e kualifikoi komunën për Grantin e Performancës./rajonipress/