Kastrati: Ky është viti i Forcave të Armatosura të Kosovës

Komandanti i Forcës së Sigurisë së Kosovës (FSK), gjenerallejtënant Kadri Kastrati, ka bërë me dije se kjo forcë është në pritje të ndryshimeve kushtetuese nga Kuvendi i Kosovës për t’u transformuar në Forca të Armatosura të Kosovës (FAK).

Ai ka thënë se FSK-ja i ka bërë të gjitha përgatitjet për ta ndërruar misionin dhe strukturën e saj.

Në këtë intervistë për “Epokën e re” ai ka treguar se pret që brenda pjesës së parë të vitit 2015 të formohen Forcat e Armatosura të Kosovës.

“Bazuar në prioritetet e qeverisë që ne dhe ju i kemi dëgjuar, Forca e Armatosur është ndër prioritet kryesore të tyre. Presim që në pjesën e parë të vitit 2015 kjo të ndodhë. Posa kjo të ndodhë, ne jemi të gatshëm të fillojmë menjëherë sepse i kemi grupet e ekspertëve, planet afatgjata zhvillimore, planet mbështetëse dhe të gjitha përgatitjet që qysh në ditën e dytë ta implementojmë projektin. Ne jemi në përfundim e sipër të doktrinave dhe rregulloreve për forcën e ardhshme. Pra, e gjithë infrastruktura ligjore është gati. I presim vetëm ndryshimet kushtetuese”, ka thënë Kastrati.

Ai ka vlerësuar se pas transformimit synimi kryesor i kësaj force mbetet anëtarësimi në NATO. “Çdoherë ne si objektiv final kemi anëtarësimin e Forcave të Armatosura në NATO, mirëpo për të ardhur deri te ky synim kemi shumë punë dhe një prej këtyre punëve është ngritja e profesionalizmit të forcës”, është shprehur Kastrati.

Duke folur për prioritetet e vitit 2015, ai ka paralajmëruar se kjo forcë do të orientohet në ngritjen e kërkimshpëtimit regjional.

Sipas tij, FSK-ja është e gatshme që qysh tash të marrë pjesë edhe në misione paqeruajtëse.

“Çdoherë dëshirë e jona e madhe dhe reale ka qenë pjesëmarrja e FSK-së apo e Forcave të Armatosura në operacione paqeruajtëse të udhëhequra nga NATO, BE-ja apo OKB-ja. Ne kemi kapacitete individuale, por edhe kolektive të japim kontribut dhe të bëhemi eksportues të sigurisë në vitin 2015”, ka deklaruar Kastrati.

Komandanti i FSK-së ka deklaruar se ndihet krenar me të gjitha të arriturat e kësaj force në vitin 2014, veçanërisht me aftësimin e pjesëtarëve të saj në shkollat më prestigjioze ndërkombëtare.