Karaqeva hap zemrat, ofron strehim e ndihmë për refugjatët nga Siria

Gjilan – Duke e parë gjendjen e rëndë të refugjatëve nga Siria dhe duke parë vuajtjet e fëmijëve e të familjarëve të pastrehë, kemi vendosur që Karaqeva të ofrojë ndihmë për të gjithë ato familje nga Siria që ndodhen në Serbi e Maqedoni. Selver Lenjani kryetar i Bashkësisë Lokale tha se askush më mirë se shqiptarët nuk e dinë se çka do të thotë të kërkosh ndihmën në këso situatash.

“Bashkësia lokale e Karaqevës së Poshtme shpreh gatishmërinë që të pranojë të gjithë ata refugjatë që kanë nevojë për strehim e ndihmë. Të gjithë jeni të mirëseardhur pa dallim feje e race dhe të gjithë jeni të mirëseardhur. Informohuni në stacionin e policisë në Muqivërc” shkruan në njoftimin e Selver Lenjanit kryetar i Bashkësisë Lokale.

Lenjani tha se këtë hap e kanë ndërmarrë duke e parë se kriza vetëm sa po rritet. “Është e pafalshme që në këtë shekull të shohësh fëmijë duke vdekur teksa kërkojnë strehim e siguri. Ne shqiptarët e dimë se çka do të thotë ndihma në këso raste, andaj kemi vendosur që t`i hapim dyert dhe t`i lëshojmë shtëpitë tona për refugjatët sirian”./rajonipress/