‘Kamxhiku’ i Biden-it mbi politikën kryeneçe kosovare

Shtyrja e seancës së Kuvendit të Kosovës për 1 shtator, në mungesë të një konsensusi politik për çështjen e Demarkacionit të kufirit me Malin e Zi, nga njohës të marrëdhënieve ndërkombëtare dhe analistë politikë po shihet si një provë serioze e presionit mbi politikën kosovare që në këtë pauzë të radhës provojnë të arrijnë një konsensus politik dhe të dalin nga kjo situatë që i ngjan rrugës pa krye

Porositë amerikane duhet të merren seriozisht.

Analistët vlerësojnë se vetëm një ndërhyrje e rreptë ndërkombëtare, siç pritet të jetë edhe vizita e Joe Biden-it javën tjetër, do t’i detyrojë liderët kosovarë të zhbllokojnë proceset, raporton Gazeta Kosova Sot

Shtyrja e seancës së Kuvendit të Kosovës për 1 shtator, në mungesë të një konsensusi politik për çështjen e Demarkacionit të kufirit me Malin e Zi, nga njohës të marrëdhënieve ndërkombëtare dhe analistë politikë po shihet si një provë serioze e presionit mbi politikën kosovare që në këtë pauzë të radhës provojnë të arrijnë një konsensus politik dhe të dalin nga kjo situatë që i ngjan rrugës pa krye. Nevoja e gjetjes së një zgjidhje adekuate bëhet akoma më urgjente kur dihet fakti se kriza e tanishme mund të pasohet nga thellimi i mëtejshëm dhe humbja e re e kohës me përplasje politike, pasi që pas demarkacionit tema e radhës akoma më serioze mbetet adresimi i çështjes së Asociacionit të komunave me shumicë serbe, një vendim akoma më i dëmshëm për vendin.

Politologu Albinot Maloku ka pohuar se katandisja e politikës kosovare ka marrë formë kryekëput si pasojë e partnerëve të koalicionit aktual, prandaj është e pritshme që edhe zgjidhja e kësaj krize të ketë si infuzion një presion të fuqishëm ndërkombëtar, që në këtë rast do të ishte vizita e javës që vjen nga nënpresidenti Joe Biden.”Krizat e njëpasnjëshme të ndodhura në vend prej paszgjedhjeve të fundit parlamentare, përmes VLAN-it, e më pastaj krijimit të këtij koalicioni, e të përcjella me tema të rënda për Kosovën, janë ato që na sollën si qytetarë e si shtet në këtë derexhe”, ka thënë ai.

Lidershipi kosovar të mos luajë me popullin Sipas Malokut, shumë nga rrethanat e krijuara në vendin tonë janë si pasojë e akteve të papërgjegjshme të vendimmarrësve e të mbështetur edhe nga ndërkombëtarët.”Nevojat dhe interesat e vendit e të popullit kanë qenë boshti kurrizor mbi të cilat janë bërë kompromise, në emër të mençurisë strategjike diplomatike për gjoja ngritjen e këtij shteti. Tani gjendemi edhe para presioneve të amerikanëve, e që rekomandimet e tyre duhet me të vërtet t’i marrim seriozisht, e jo siç ka bërë deri tani politika kosovare”, theksoi më tej ai. “Lidershipi kosovar duhet ta ndalojë lojën e topave me popullin e vet, e po ashtu edhe me miqtë tanë, si shtete serioze që janë. Republikës së Kosovës i duhen zhvillimi e ngritja. Temat për të dhe rreth saj kanë qenë të rënda, por ato kalohen e duhet të kalohen. Vizitën e nënpresidentit amerikan, Joe Biden, në Kosovë e shoh në frymën e angazhimit amerikan për një rajon e Kosovë stabile”, tha politologu Albinot Maloku, njohës i marrëdhënieve ndërkombëtare./kosova sot/