Kamenica shënon 15 vjetorin e çlirimit, uron Matoshi

Kamenicë – Fatmir Matoshi nënkryetar i Komunës së Kamenicës ka uruar me rastin e 18 qershorit ditës së çlirimit të Kamenicës. Sot komuna e jonë shënon 15 vjetorin e çlirimit të saj dhe është një moment i mirë për të kthyer edhe njëherë në vëmendjen tonë sakrificën e secilit qytetar të Kamenicës që ka bërë për të jetuar sot të lirë ka shkruar Matoshi.

Sot u përulemi dëshmorëve tanë që dhanë jetën për lirinë tonë dhe fituan pavdekësinë e tyre.

Në këtë ditë të rëndësishme për Kamenicën kujtojmë të arriturat tona si shoqëri, si institucione dhe falënderojmë secilin që ka kontribuar për komunën tonë. Lufta e bërë për liri, dëshmorët tanë, brezat që ishin para nesh dhe mbi të gjitha fëmijët tanë na obligojnë sot që të jemi më të përgjegjshëm, më punëtorë dhe më këmbëngulës në synimet tona për ta bërë Kamenicën një vend më të zhvilluar dhe më të lehtë për të jetuar në të.

Uroj që të gjithë Ju në radhë të parë të keni shëndet, të jetoni dinjitetshëm dhe krenar për komunën tonë, të hapet perspektivë për të gjithë ata që janë pa një vend pune, të kemi shkolla, rrugë dhe spitale më të mira, sfida këto që së bashku mund t`i arrijmë ka nënvizuar Fatmir Matoshi./rajonipress/