Kamenica promovon turizmin lokal

Kamenicë – Zyra e Sektorit të Turizmit në Kamenicë, në kuadër të Drejtorisë për Zhvillim Ekonomik dhe Diasporë me qëllim të promovimit të turizmit lokal, atraksioneve turistike dhe ushqimit tradicional, ka organizuar ecje në “Shtegun e atletëve” në fshatin Roganë.

Ishte kjo ecja e parë e organizuar që nga themelimi i Zyrës së Turizmit në Kamenicë, në mars të këtij viti. Të pranishëm kishte nga të dyja gjinitë si dhe të rinj e të moshuar.
Pikënisja për të gjithë ishte nga vendi i quajtur “Fungishta” për ta përshkuar shtegun prej 7 kilometrash.
“Pritjet për pjesëmarrje më masive ishin të mëdha, sepse kemi bërë informimin me kohë, si dhe kemi shpërndarë edhe ftesa në drejtori të ndryshme komunale”, thotë zyrtarja për turizëm në Kamenicë, Nexhmije Kallaba.

Sipas saj, duke promovuar turizmin lokal, përkatësisht ecjen në natyrë, përfitojnë vetë njerëzit, duke shpresuar që në ecjet e radhës të bashkëngjiten më shumë qytetarë.

Zyrtarë komunal, qytetarë e anëtarë të Klubit atletik “Rogana”, kanë ecur në një pjesë të “Shtegut të atletëve”, ku ushtrojnë atletë të këtij klubi që tashmë garojnë në nivele të ndryshme kombëtare e ndërkombëtare.

Falë një bashkëpunimi me studentë të Shkollës së Lartë të Turizmit në Lucernë të Zvicrës, që nga viti 2018, ky shteg është shenjëzuar me tabela orientuese që nga bujtina Kallaba Guesthouse dhe anasjelltas.

Në promovim të ushqimit tradicional – flisë, të pranishmit realizuan edhe një drekë nën hijet e pishave te vendi i quajtur “Guri i gatë”./rajonipress/

Shpërndaje.
© RAJONIPRESS

Vërejtje!

RajoniPress.com nuk do të botojë shkrime që nuk i përmbushin kriteret dhe standardet profesionale të gazetarisë bashkëkohore. Nuk do të ketë për askënd mbyllje apo censurë, por jemi të fokusuar që në këtë agjenci, lajmi, shkrimi, raporti, intervista dhe opinioni të plotësojnë kriteret profesionale. Gjithashtu opinionet, analizat, komentet, nuk duhet të shkelin parimet etike (gjuhën e urrejtjes, fyerjet, diskriminimet e çfarëdoshme).