Kamenica përkujton dëshmorët

Gjilan – Dëshmorët me sakrificën e tyre i dhanë krenarinë atdheut dhe të gjithë popullit. Ata vulosën me gjakun e tyre besnikërinë dhe devotshmërinë e përjetshme për vendin që i lindi dhe i rriti. Falë gjakut të derdhur, punës dhe sakrificës së popullit liridashës dhe ndihmës së faktorit ndërkombëtarë në krye me SHBA-të, populli ynë sot jeton i lirë dhe dinjitoz, e fëmijët rriten të gëzuar e pa frikë nga terrori barbar tha Shaip Surdulli.

Me rastin e 14 vjetorit të rënies së dëshmorit Asllan Thaçi, të shtunën në Karaçevë të Poshtme është mbajtur tubim përkujtimorë. Në këtë tubim i pranishëm ishte edhe Kryetari i komunës së Kamenicës, Shaip Surdulli me bashkëpunëtorë, familjarë të dëshmorëve dhe qytetarë të këtij fshati e më gjerë.

Kryetari i komunës së Kamenicës, Shaip Surdulli, u shpreh se dëshmori i kombit Asllan Thaçi dhe dëshmorët e tjerë nuk janë më në mesin tonë, por vepra e tyre heroike kurrë nuk vdesin. “Prandaj përulemi me nderim, sepse atyre u detyrohemi me të shtrenjtën gjë që ka njeriu i qytetëruar, dinjitetin dhe lirinë”.

Surdulli, tha se Asllani dallohej për sjellje të mirë, për punë profesionale si jurist, për humanitet që gjithmonë e ka pasur edhe përkrahjen e familjes për aktivitet solidar, të informimit dhe aktivitetet tjera kombëtare.

“Dëshmorët me sakrificën e tyre i dhanë krenarinë atdheut dhe të gjithë popullit. Ata vulosën me gjakun e tyre besnikërinë dhe devotshmërinë e përjetshme për vendin që i lindi dhe i rriti. Falë gjakut të derdhur, punës dhe sakrificës së popullit liridashës dhe ndihmës së faktorit ndërkombëtarë në krye me SHBA-të, populli ynë sot jeton i lirë dhe dinjitoz, e fëmijët rriten të gëzuar e pa frikë nga terrori barbar” tha Surdulli.

Ndërkaq, Ramadan Guda, drejtor i shkollës fillore “Asllan Thaçi” ndër të tjera tha se: jemi tubuar sot për të përkujtuar njërën ndër figurat më të rëndësishme dhe më të respektueshme të historisë sonë më të re, figurë e cila tërë jetën ishte në shërbim të realizimit të aspiratave tona kombëtare.

“Sot këtu pranë lapidarit të dëshmorëve po përkujtojmë jetën dhe veprën e njeriut tonë të dashur, të sinqertë, humanistit e aktivistit të palodhshëm të çështjes kombëtare, juristit tonë të shkëlqyer i cili me aktin e tij heroik sikurse edhe shumë dëshmorë të tjerë bënë që Kosova të jetë shtet i pavarur” tha drejtori Guda.

Tubim përkujtimor është mbajtur edhe me rastin e 14 vjetorit të rënies së Selver e Emin Kryeziun dhe martirin Nevzad Kryeziu

Edhe këtu Surdulli tha se dëshmorët e kombit gjatë gjithë kohës janë të respektuar për idealin e tyre për çlirim, për guximin dhe vendosmërinë që e kanë pasur për flijimin edhe të jetës së tyre, për veprën heroike që e kanë dëshmuar .

“Ata kurrë nuk do të harrohen dhe kurrë nuk do të vdesin, por gjithmonë do të mbeten në freskinë e mendjes së qytetarëve, do të mbesin në kujtesën e popullit tonë” tha Surdulli.

Tutje Surdulli tha se para 14 viteve ne nuk e kishim as lirinë, ishim në ankth në mes jetës dhe vdekjes. Në atë kohë ndodhën shumë vrasje, dhunime, plaçkitje, djegie të shtëpive e shumë gjëra të këqija ndaj popullit shqiptarë nga ushtria, policia e paramilitarët serbë.

Ndërkaq, në emër të familjarëve, foli Ruzhdi Kryeziu, babai i dëshmorit Emin Kryeziu, i cili falënderoi të gjithë për pjesëmarrje në këtë tubim. Në fund u vunë kurora lulesh para lapidarit të dëshmorëve Selver dhe Emni Kryeziu, si dhe tek varri i martirit Nevzad Kryeziu./rajonipress/