Kamenica nis procesin e dezinfektimit, dezinsektimit dhe deratizimit, apel për kujdes nga qytetarët dhe bletarët

Kamenicë – Komuna e Kamenicës ka njoftuar se nga mbrëmja e sotme do të fillojë procesi i dezinfektimit, dezinsektimit dhe deratizimit hapësinor (DDD), një ndërhyrje e planifikuar me qëllim të ruajtjes së shëndetit publik dhe përmirësimit të kushteve mjedisore.

Sipas njoftimit zyrtar, aktiviteti do të nisë nga ora 20:00, fillimisht në qytetin e Kamenicës dhe në fshatin Berivojcë, ndërsa në ditët në vijim do të shtrihet edhe në lokalitetet e tjera të komunës.

Autoritetet komunale u kanë bërë thirrje qytetarëve që gjatë zhvillimit të procesit të tregojnë kujdes të shtuar, duke mbajtur të mbyllura dyert dhe dritaret e objekteve të banimit në orët e mbrëmjes kur do të realizohen trajtimet.

Një apel i veçantë u është drejtuar edhe bletarëve, të cilëve u kërkohet që gjatë ditës së sotme dhe nesër në mbrëmje t’i mbajnë të mbyllura kosheret e bletëve deri në përfundimin e procesit, me qëllim të mbrojtjes së tyre nga efektet e mundshme të preparateve që do të përdoren.

Komuna thekson se procesi do të zhvillohet sipas standardeve të parapara dhe në funksion të mbrojtjes së shëndetit të qytetarëve dhe mjedisit./rajonipress/