Kamenica me aktivitete shënon ditën kundër duhanit

Gjilan – Me moton “ Merr frymë shlirë”, të premten në Shtëpinë e Kulturës “Isa Kastrati”, në Kamenicë është shënuar 31 Maji “ Dita Ndërkombëtare kundër duhanit”, organizuar nga Njësia Komunale për të Drejtat e Njeriut.

Nazmije Demolli-Kastrati, Koordinatore e Njësisë Komunale për të Drejtat e Njeriut, ka thënë se çdo vit shënimi i 31 majit “ Ditës Ndërkombëtare kundër duhanit”, është pjesë e përpjekjeve, që synojnë të ulin kërcënimet që pirja e duhanit ka për shëndetin e njeriut .

Ajo tha se sipas, Organizatës Botërore të Shëndetësisë, llogaritet se çdo 6.5 minuta në botë vdes një njeri nga pasojat e pirjes së duhanit, kështu rreth 5 milion persona gjejnë vdekjen në një vit.

“Duhani paraqet sot njërin prej kërcënimeve të mëdha të shëndetit publik dhe në këtë aspekt është krijuar korniza ligjore për luftimin e duhanit, ndërsa politika të mira janë ato që mundësojnë zbatimin e tyre” ka thënë Kastrati.

Ndërkaq, Dr. Ferid Beqiraj, Inspektor Sanitar, foli për ligjin e duhanit, pasojat dhe sëmundjet që mund të shkaktohen nga konsumimi i duhanit.

Ai foli edhe për nenin 11, pika 11.1 të ligjit për duhanin, në të cilin nen thuhet se të gjitha institucionet që merren me edukimin dhe arsimin e fëmijëve dhe të rinjve obligohen që të ndërmarrin aktivitete që promovojnë vetëdijesimin e popullatës së re mbi dëmet që shkakton pirja e duhanit.

Koordinatorja e Njësisë Komunale për të Drejtat e Njeriut, ka shpërndarë edhe fletëpalosje./rajonipress/

Shpërndaje.
© RAJONIPRESS

Vërejtje!

RajoniPress.com nuk do të botojë shkrime që nuk i përmbushin kriteret dhe standardet profesionale të gazetarisë bashkëkohore. Nuk do të ketë për askënd mbyllje apo censurë, por jemi të fokusuar që në këtë agjenci, lajmi, shkrimi, raporti, intervista dhe opinioni të plotësojnë kriteret profesionale. Gjithashtu opinionet, analizat, komentet, nuk duhet të shkelin parimet etike (gjuhën e urrejtjes, fyerjet, diskriminimet e çfarëdoshme).