Kamenica e Lezha shkëmbejnë përvojat në menaxhimin e mbeturinave

Gjilan- Drejtori i drejtorisë së Shërbimeve Publike dhe Ambienti, Hysen Jerliu, drejtori për Ekonomi, Buxhet dhe Financa, Rabit Halili dhe drejtori i drejtorisë së Administratës, Enver Ajvazi, kanë pritur drejtorin e shërbimeve Publike të Bashkisë së Lezhës, Nikolin Prendi, udhëheqësin e projektin “ EcoUCD”, Gjon Leka, si dhe gazetarin e TVSH Rrok Lelçaj.

Ky takim ka pasur për synim shkëmbimin e përvojave mes komunës së Kamenicës dhe asaj të Lezhës, në fushën e menaxhimit të mbeturinave dhe të ndriçimit publik.

Drejtori i drejtorisë së Shërbimeve Publike dhe Ambientit, Hysen Jerliu, e ka njoftuar delegacionin nga Shqipëria me mënyrën e menaxhimit të mbeturinave dhe të ndriçimit publik si dhe i ka falënderuar për vizitën që i bënë komunës së Kamenicës.

Jerliu, tha se me plotësimin e ligjit për ndërmarrjet publike, komunave u është mundësuar themelimi i ndërmarrjeve të reja publike lokale. “Komuna e Kamenicës i ka kryer të gjitha procedurat për themelimin e ndërmarrjes së re publike dhe jemi duke pritur vendimin nga ana e Qeverisë së Republikës së Kosovës” ka thënë Jerliu.

Ai tha se në fillim, ndërmarrja publike “ Ambienti” në Kamenicë, ka pasur shumë vështirësi, duke e ditur që kjo kompani ka dy kamion në gjendje jo të mirë të funksionimit dhe një traktor.

Nikol Prendi, drejtor i Shërbimeve Publike në Bashkinë e Lezhës, po ashtu ka njoftuar për mënyrën e menaxhimit në fushën e mbeturinave dhe atë të ndriçimit publik në Bahskinë e Lezhës.

Ndërkaq, Gjon Gjoka, udhëheqës në “ EcoUCD”, ka prezantuar një projekt për ndriçimin publik, i cili llogaritet të jetë më i favorshëm si në aspektin e kursimit të energjisë po ashtu edhe në cilësinë e dhënies së dritës.

Edhe drejtori për Ekonomi, Buxhet dhe Financa dhe drejtori i Administratë së Përgjithshme, kanë falënderuar delegacionin nga Lezha duke e quajtur takimin si të frytshëm dhe dobiprurës për të dyja qytetet./rajonipress/