Kamenica bëhet me zyre të diasporës

Gjilan – Kreu i Komunës së Kamenicës thotë për rajonipress se ai dhe i tërë stafi i tij janë të përkushtuar dhe të interesuar që tu dalin në çfarëdo ndihme mërgimtarëve që këto ditë po qëndrojnë në vendlindjet e tyre. Enkas për mërgimtarët kemi organizuar edhe “Takimet e bashkatdhetarëve 2013” , derisa në kuadër të këtyre aktiviteteve do të hapim edhe zyrën e diasporës tha Surdulli.

Komuna e Kamenicës pos që ka shtuar kujdesin ndaj mërgimtarëve sa i përket nxjerrjes së dokumenteve ajo është kujdesur që pushimet e tyre të jenë të përcjellura edhe me aktivitete të ndryshme nga jeta politike, kulturore e arsimore.

Kreu i Komunës Shaip Surdulli tha për rajonipress se mërgimtarët meritojnë respektin më të madh të institucioneve komunale. “Jo vetëm unë, por i tërë stafi i komunës së Kamenicës janë të angazhuar dhe të përkushtuar që tu dalin në ndihmë mërgimtarëve. Kjo kategori e jona ka bërë shumë për Kosovën dhe për Kamenicën andaj edhe obligimi ynë institucional ndaj tyre është i madh” tha Surdulli.

Surdulli thotë se pos një programi të pasur që do të jepet në kuadër të manifestimit tradicional “Takimet e bashkatdhetarëve 2013” , në këtë qytet do të hapet edhe zyra e diasporës.”Mendojë që është një hap i mirë dhe i domosdoshëm për ne sepse kjo zyre na ndihmon shumë që të komunikojë më mirë me diasporën dhe të dimë më hapur telashet dhe preokupimet e tyre” tha Surdulli.

Ndryshe në kuadër të këtyre manifestimeve për diasporën që organizohen nën patronatin e kryetarit të komunës dhe me zyrën e diasporës e drejtorinë e kulturës janë paraparë takime të bashkatdhetarëve me strukturat komunale, takime të bizneseve të diasporës dhe bizneseve vendore për këmbim përvojash, pastaj aktivitete kulturor e sportive etj./rajonipress/