Kameleoni i vitit – Isa Mustafa

Isa Mustafa mund të mos e mbajë mend as vetë sa herë brenda vitit 2014 i ka ndryshuar qëndrimet, parimet e pohimet. Edhe pse ia kishte përmendur shumë herë Rusinë e ai ia kishte krahasuar Prishtinën me Kandaharin – Isa Mustafa në maj i shkoi në pallatin e tij në Hajvali Behgjet Pacollit për ta lutur për koalicion. Kur ky s’pranoi të shkrijë shkronjat e AKR-së në LDK, u morën vesh që pas zgjedhjeve të bashkëqeverisin.

Në pjesën tjetër të rezidencës ishte Hashim Thaci duke provuar të njëjtën – për një parti që në fund s’do të mund të ndihmonte as veten. Kur zgjedhjet e 8 qershorit përfunduan Mustafës iu deshtë të shpallë një humbje të re – të tretën me radhë të LDK-së në nivel qendror.

Plot 5 % prapa PDK-së dhe koalicionit të saj parazgjedhor. Heshtja aty zgjati vetëm 2 ditë, pasi që më 10 qershor Mustafa u pajtua të heqë dorë nga posti i kryeministrit për t’ia lënë këtë Ramush Haradinajt në lidhjen e marrëveshjes të asaj që do të njihej si Blloku LAN, pasi që aty hyri edhe Nisma e Fatmir Limajt.

Pajtimi i madh erdhi pak muaj pasi që LDK e AAK u kapën aq keq në Pejë, sa druhej ndonjë incident. Në LDK e lidhën Haradinajn me vrasjen e Zemajt, e AAK tha se Mustafa ishte ministër i Rrahman Morinës. Më 17 korrik Isa Mustafa do të përjetonte hapin e parë të ngjitjes në pushtetin qendror – që do t’i zgjaste vetëm pak ditë.

Shpresa në pikën 127 e mbajti gjallë Mustafën, por përvec një debate vet-me-vete në tetor, Blloku s’e përdori. Për më tepër u pajtua me vendimin se kryeparlamentari i takonte PDK-së, pasi Ambasadorja Jackobson i shau publikisht. E dorëzuan kryeparlamentarin, por thanë se Blloku ecen përpara. Por, marrëveshja e 10 qershorit e linte duarthatë e papushtet Mustafën. Degët nisën të flasin në emër të tij. Thanë, se me rrethanat e reja Mustafa duhej të bëhej kryeministër e Haradinaj të merrte ndonjë post nën të. Ky i fundit nuk pranoi e Mustafa se kishte ndërmend të hiqte dorë nga pushteti që e kishte aq afër. Më 19 nëntor mblodhi Këshillin e Përgjithshëm të LDK-së dhe u tha se është mirë të hapen ndaj të gjithë shqiptarëve – që në këtë rast ishin edhe PDK-ja. 2 orë pas votës me shumicë, në zyrën e Presidentes e takoi për herë të parë pas zgjedhjeve Hashim Thacin – dhe bëri koalicion qeverisës me të.

Koalicion PDK-LDK. Por, me të kryeministër. Marrëveshjen me rivalin e tij më të madh politik – Mustafa e nënshkruajti ditën e votimit të kryetarit të ri të Kuvendit. U tha deputetëve të vet ta votonin Kadri Veselin – kryetar Kuvendi. Ish-udhëheqësin e SHIK-ut që ai dhe LDK në shumë raste thanë se është organizatë kriminale që duhet hetuar.

Por, me rëndësi për të: u betua kryeministër me votat e PDK-së më 9 dhjetor. Shpreson ta mbajë mandatin deri në fund, ose së paku derisa ta bëjë Hashim Thacin president, në gjirin e të cilit përfundoi pasi kishte bërë xhiron tek Pacolli fillimisht për të kaluar kah Haradinaj, Limaj e Kurti. Isa Mustafa – është Kameleoni i Vitit./koha/