Kamberi në Prishtinë: Lugina e Preshevës të jetë e përfaqësuar në bisedimet Kosovë – Sërbi

Kryetari i komunës së Bujanocit, Shaip Kamberi gjatë diskutimit të tij në konferencën “Skenarët e ‘Finales së Madhe’ ndërmjet Kosovës dhe Serbisë”, të organizuar në Prishtine foli për pjesëmarrjen e Luginës në këtë proces.

“Lugina e Preshevës të jetë e përfaqësuar në mënyrë përmbajtësore në bisedimet Kosovë – Sërbi, reciprociteti i patjetërsueshëm”, tha mes tjerash Kamberi.

Presidenti Hashim Thaçi, pas 7 vjetësh dialog me Serbinë, në këtë konferencë tha se ka ardhur koha për marrëveshjen ligjërisht të obligueshme.

Përveç njohjes nga Serbia, kjo marrëveshje, sipas Thaçit, do të duhej të sillte edhe njohjen e Kosovës nga 5 shtetet anëtare të BE-së dhe përshpejtimin e rrugës integruese drejt BE-së.

Se viti 2018 është viti kur duhet arritur progres në dialog, e ka thënë edhe ambasadori amerikan në Kosovë, Greg Delawie, derisa ka përmendur se edhe formati aktual ka sjellë rezultate.

Por kryeministri Ramush Haradinaj ka shprehur zhgënjimin e tij me ecurinë e dialogut, që ndërmjetësohet nga BE-ja, madje ka thënë se vazhdimi i një gjendjeje të tillë mund edhe të ricikloj kriza në Ballkan.

Kryetari i Lëvizjes Vetëvendosje, Albin Kurti, ka kërkuar të bëhet një bilanc i arritjeve të deritashme të dialogut, si dhe qartësim të synimeve nga dialogu, pasi sipas tij, dihet qartë se Serbia kërkon bosnjëzimin e Kosovës.

Shpërndaje.
© RAJONIPRESS

Vërejtje!

RajoniPress.com nuk do të botojë shkrime që nuk i përmbushin kriteret dhe standardet profesionale të gazetarisë bashkëkohore. Nuk do të ketë për askënd mbyllje apo censurë, por jemi të fokusuar që në këtë agjenci, lajmi, shkrimi, raporti, intervista dhe opinioni të plotësojnë kriteret profesionale. Gjithashtu opinionet, analizat, komentet, nuk duhet të shkelin parimet etike (gjuhën e urrejtjes, fyerjet, diskriminimet e çfarëdoshme).