Kamberi në parlamentin serb ku u votua për Daçiqin: Nuk jeni i denjë për votën tonë, mohuat krimet e luftës e po fshihni varrezat masive

Mohimi i krimeve të luftës në Kosovë, deklaratat për fshehjen e varrezave masive dhe shprehja e tij me përbuzje ndaj pakicave, ishin arsyet për të cilat grupi parlamentar, Lugina e Bashkuar dhe SDA Sanxhaku nuk kanë votuar për zgjedhjen Ivica Daçiqit si kryetari i parlamentit të Serbisë.

Gjatë fjalimit të tij si përfaqësues i këtij grupi parlamentar, deputeti shqiptar, Shaip Kamberi tha se ata nuk i kishte konsultuar askush as për këtë kandidaturë, e as për formimin e qeverisë, e pavarësisht kësaj përmendi edhe arsye të tjera për të cilat ata nuk votuan për zgjedhjen e kryetarit të parlamentit.

Kamberi tha se nuk do të votojnë për Daçiqin sepse ai i përket kohës së politikanëve që kanë nxitur e shkaktuar tragjeditë e përgjakshme dhe krimet e luftës në Kosovë.

“Por, arsyeja përmbajtjesore e mos votimit tonë për Ivica Daçiqin për kryetar parlamenti ka të bëjë me faktin se Daçiq i përket nomenklaturës politike e cila ka nxitur dhe shkaktuar tragjeditë e përgjakshme të viteve 90-ta dhe krimet e luftës në Kosovë”, u shpreh ai në parlamentin serb.

Mohimi i krimeve të luftës medie dhe domosdoshmëria për fshehjen e varrezave masive për të cilat Daçiq u deklarua publikisht ishin edhe një arsye më shumë që bëri deputetët shqiptarë e boshnjakë të mos merrnin pjesë fare në votim.

“Aq më tepër, deklaratat e tij të fundit, përmes të cilave mohon krimet e luftës ndaj shqiptarëve në Kosovë dhe hapur, në mediumet publike flet për domosdoshmërinë e fshehjes së varrezave masive të shqiptarëve në Serbi, e bën atë të padenjë për votën tonë”, tha Kamberi.

Kamberi theksoi se Daçiq nuk paraqet personalitet i cili meriton përkrahjen e deputetëve të pakicës në Serbi.

“Grupi parlamentar Lugina e Bashkuar dhe SDA Sanxhakut nuk do të votojë për zgjedhjen e Ivica Daçiqit për kryetar të parlamentit. Me ne askush nuk ka zhvilluar konsultime as për kandidaturën për kryetar parlamenti as për krijimin e qeverisë së re për të cilën po dëgjojmë nga mediat. Si personalitet i cili hapur flet me përbuzje për pakicat, Daçiq nuk paraqet personalitetin që meriton përkrahjen e gjithë deputetëve sidomos jot ë pakicave”, u shpreh ai.

Ndër të tjera, Kamberi theksoi se ishte vet Daçiq që nisi procesin e shlyerjes së shqiptarëve dhe boshnjakëve nga evidenca e vendbanimeve në Serbi.

“Derisa ishte ministër i policisë, Ivica Daçiq, ka nisur procesin e shlyerjes së shqiptarëve dhe boshnjakëve nga evidenca e vendbanimeve duke ndikuar kështu në ndryshimin artificial të strukturës etnike në këto rajone, prandaj edhe vota jonë nuk do të jepet për këtë kandidat”, tha Kamberi.

Ndryshe, ish-ministri i Punëve të Jashtme të Serbisë, Daçiq ka marr besimin e plotë të deputetëve për të udhëhequr këtë institucion shtetëror, raporton b92.

Nga 226 deputetët e pranishëm në seancën konstituive, vetëm një prej tyre ishte kundër liderit të SPS-it, gjersa 225 votuan pro.

Shpërndaje.
© RAJONIPRESS

Vërejtje!

RajoniPress.com nuk do të botojë shkrime që nuk i përmbushin kriteret dhe standardet profesionale të gazetarisë bashkëkohore. Nuk do të ketë për askënd mbyllje apo censurë, por jemi të fokusuar që në këtë agjenci, lajmi, shkrimi, raporti, intervista dhe opinioni të plotësojnë kriteret profesionale. Gjithashtu opinionet, analizat, komentet, nuk duhet të shkelin parimet etike (gjuhën e urrejtjes, fyerjet, diskriminimet e çfarëdoshme).