Kadriu: Pensionistët pjesë e prioriteteve të AAK-së

Gjilan – Pensionistët janë një kategori e shoqërisë tonë me të cilët qysh nga paslufta nuk është marrë askush. Ne si Aleancë jemi të interesuar që t`i ndihmojmë secilës kategori të shoqërisë tonë pa dallim, prandaj edhe pensionistët janë padyshim pjesë e prioriteteve tona, ka thënë Rexhep Kadriu gjatë vizitës që i ka bërë Sindikatës së Pensionistëve dhe Invalidëve të Punës në Gjilan.

Kryetari i AAK-së në Gjilan dhe kandidati për kryetar të komunës Rexhep Kadriu, të premten ka vizituar Sindikatën e Pensionistëve dhe Invalidëve të punës në Gjilan, me ç’rast është pritur nga kryetari i kësaj sindikate Muharrem Bajrami.

Qëllimi i vizitës janë problemet e mëdha me të cilat po përballen pensionistët e komunës së Gjilanit si dhe shqyrtimi i kërkesave dhe nevojave që pensionistët kanë.

“Pensionistët janë një kategori e shoqërisë tonë me të cilët qysh nga paslufta nuk është marrë askush. Ne si Aleancë jemi të interesuar që t`i ndihmojmë secilës kategori të shoqërisë tonë pa dallim, prandaj edhe pensionistët janë padyshim pjesë e prioriteteve tona”, ka thënë Kadriu.

Kadriu ka thënë më tej se si pasojë e keq qeverisjes së qytetit tonë, pensionistët kanë ardhë në gjendjen në të cilën gjenden tani, përderisa vet kryetari i tanishëm i komunës, e ka për obligim që t`i vizitojë këto sindikata, gjë që nuk e ka bërë asnjëherë.

Ndërkaq, Muharrem Bajrami kryetar i sindikatës, ka thënë se problemet me të cilat janë ballafaquar pensionistët nuk janë evituar asnjëherë, pos që janë shtuar.

“Ne presim ndryshime në qeverisje, shpresojmë se qeverisja e ardhshme do të jetë e ndryshme nga e tanishmja dhe nuk do të ketë keqpërdorime siç ka pasur deri më tani. Ndërsa, shpresojmë se nuk do ta vazhdojmë ta përjetojmë këtë gjendje të mjerueshme të cilën po e përjetojmë tash e një kohë”, ka thënë Bajrami.

Kadriu, i cili në këtë takim është shoqëruar nga bartësi i listës së AAK-së për Asamblenë Komunale Selami Xhemajli dhe sekretari i përgjithshëm Nazim Gagica, ka premtuar përkrahje dhe mbështetje për pensionistë, ndërsa me marrjen e pushtetit më 3 nëntor, ai ka thënë se pensionistët do ti gëzojnë të gjitha kushtet e nevojshme./rajonipress/