Kadriu: Opozita duhet të bashkohen në Gjilan

Gjilan – VV e PDK e partitë e tjera opozitare, duhet të bashkohen në mënyrë që ta heqin Lutfi Hazirin e LDK-në, AAK-në, AKR-në, KDTP, LS-në nga pushteti. Duhet që patjetër t’i japin fund të keqes së madhe që e ka pllakosur komunën tonë, e që quhet qeverisja Haziri thotë Kushtrim Kadriu.

“Haziri e LDK, ka shumë vite që po e qeverisin Gjilanin pa ndonjë zhvillim të dukshëm, ose, thënë më mirë po e keqqeverisin Gjilanin në mënyrën më të ultë të mundshme. Gjilani edhe më tutje mbetet komunë shumë e varfër dhe pa pikë perspektive. Ende të rinjtë e të rejat duan të ikin një orë e më parë nga kjo komunë e varfër. Gjilani është komunë me shumë potencial, por që z. Haziri as që do t’ia dijë për të. Ai, ose nuk diti ose nuk deshi t’ia dijë për zhvillimin e Gjilanit” shprehet Kadriu.

Kadriu mendon se partitë opozitare duhet që t’i kalojnë ndasitë e tyre dhe t’i bashkojnë forcat e tyre në mënyrë që ta shpëtojnë Gjilanin njëherë e përgjithmonë nga qeverisja injorante dhe dëmshme e Lutfi Hazirit, e cila e mbyti përfundimisht shpresën për një të ardhme më të mirë. “Ky pushtet nuk bëri gjë tjetër pos që zvarriti e zvarriti pa kufi çdo punë që e nisi, shumë prej tyre edhe i bëri komplet gabim, apo i bëri vetëm sa për të thënë. Ndërsa, sa i përket zhvillimit e punësimit as që u bë fjalë. Nuk mbetet rrugë tjetër, pos që të krijohet blloku opozitarë dhe në këtë mënyrë të shpëtohet Gjilani nga kjo klase e stërvjetër politike e cila qëndron bë vendnumëro. Këtë e kanë obligim ndaj qytetarëve të Gjilanit dhe ndaj gjeneratave të ardhme” thotë në fund Kushtrim Kadriu./rajonipress/