Kadriu: Nuk e tradhtuam LDD, nuk kemi obligime ndaj tyre

Gjilan – Rexhep Kadriu kryetar i AAK-së në Gjilan tha për rajonipress se nuk ndien kurrfarë obligimi ndaj degës së LDD-së në Gjilan. Me zgjedhjet e fundit dhe me rezultatin e publikuar u pa qartë se LDD nuk ka elektorat në Gjilan. Nuk i kemi hyrë në hak LDD-së dhe realisht nuk ndiejmë asnjë obligim ndaj tyre thotë Kadriu.

Kryetari i LDD-së Nexhat Daci gjatë një takimi që ka pasur me strukturat e saja në Gjilan ka lëshuar akuza edhe ndaj partnerit lokal AAK-së që drejtohet nga Rexhep Kadriu, raporton rajonipress.

“LDD si në nivelin qendror ashtu edhe në atë lokal është e zhgënjyer edhe nga partneri lokal në Gjilan, sepse LDD-ja e kësaj komune nuk e ka merituar një sjellje të papërgjegjshme të AAK-së së Gjilanit”. Kështu ishte shprehur Daci duke ju referuar marrëveshjeve që ka pasur LDD – AAK në balotazhin e zgjedhjeve të fundit për Gjilanin.

Por kjo deklaratë e Dacit nuk e brengos e as shqetëson aspak Rexhep Kadriun e AAK-së. “Me përgjegjësi të plotë mund të them se nuk kemi asnjë obligim ndaj LDD-së në Gjilan e as ndaj Dacit në qendër. Ne si AAK marrëveshjen në nivel qendror e kemi respektuar dhe realisht nuk i kemi hyrë në hak LDD-së në Gjilan” sqaron për rajonipress Kadriu.

Kadriu tha se nuk ndien asnjë obligim ndaj LDD-së në Gjilan sepse s`ka pasur kurrfarë marrëveshje me ta. “Fuqia e votës së LDD-së e cila solli vetëm 320 vota të tyre tregon se ata nuk kanë elektorat në Gjilan. Fuqia e tyre minimale tregon më së miri vendin e tyre ku mund ta kenë ata” tha Kadriu.

Kadriu thotë se asnjëherë nuk është takuar me ata të LDD-së edhe pse thotë se kanë kërkesa që absolutikisht janë të paqëndrueshme. “Unë e ndiej vetën të pastër dhe kështu po punojë vazhdimisht për të mirën e qytetarëve të Gjilanit. Pjesa politike dhe institucionale tashmë në Gjilan është e qartësuar dhe e stabilizuar përfundimisht” tha Kadriu. /rajonipress/