Kadriu i AAK-së sfidon pushtetin komunal

Gjilan – Rexhep Kadriu nuk është ndalur me punën e tij vullnetare për të ndihmuar qytetaret dhe ata banorë që me vite janë injoruar nga pushteti komunal. Të mërkurën ai ka marrë pjesë në një aksion simbolik në rregullimin e rrugës ”Gjon Buzuku”.

Rexhep Kadriu kreu i AAK-së në Gjilan ka filluar seriozisht ta sfidojë pushtetin komunal në të gjitha sferat. Kadriu nuk është ndalur as në kohën kur ka rënë shi këtë të mërkure.

I shoqëruar edhe nga aktivistët tjerë të AAK-së Kadriu ka marrë pjesë në aksionin për ta meremetuar rrugën ”Gjon Buzuku” në lagjen “Dheu i Bardhë”. Kjo rrugë sipas Kadriut me vite nuk është riparuar dhe me vite janë injoruar kërkesat e këtyre banorëve nga pushteti komunal.

Kadriu së bashku me aktivistët ka hedhur rërë e beton dhe e ka bërë të kalueshme rrugën e cila me vite nuk është trajtuar nga kontraktuesit e rrugëve.

Xhevat Demiri banor në këtë lagje tha për rajonipress se ndihet i befasuar nga ky aksion simbolik , por shumë domethënës.”Ka 6 vite që asnjë zyrtar nuk e ka marrë seriozisht rregullimin e kësaj rruge. Ky aksion vërtet na ka ngjallur shpresat se gjërat do të lëvizin pozitivisht” tha Demiri./rajonipress/