Kadriu i AAK i jep mbështetje Universitetit të Gjilanit

Gjilan – Arben Dërmaku kryetar i këshillit themelues të Universitetit të Gjilanit i shoqëruar edhe nga Sabri Tahiri e Flamur Hyseni kanë pritur në një takim pune kreun e AAK-së në Gjilan dhe kandidatin për kryetar komune Rexhep Kadriun. Kadriu ka ofruar mbështetje dhe ka thënë se për Gjilanin është lajmi më mirë hapja e këtij Universiteti.

Rexhep Kadriu së bashku me bashkëpunëtorët e tij ka qëndruar të premten në hapësirat e Universitetit të Gjilanit ku për punën e këtij institucioni arsimor e ka informuar Arben Dërmaku kryetar i këshillit themelues të Universitetit të Gjilanit.

Arben Dërmaku ka dhënë një pasqyrë të gjendjes së këtij Universiteti dhe ka thënë se edhe pse me vonesë themelimi i këtij Universiteti është shumë i rëndësishëm për Anamoravën.”Në këtë Universitet të dijes do të ketë vend për të gjithë studentët duke përfshirë këtu edhe ata nga Kosova Lindore dhe studentët e komunave të rajonit” ka thënë Dërmaku.

Dërmaku është shprehur optimist se Universiteti i Gjilanit do të dijë të menaxhojë dhe funksionalizojë anën pedagogjike, intelektuale e dhe tha se çdo përkrahje e liderëve politikë apo mbështetje morale nga ana e tyre është e mirëseardhur.

Kurse Rexhep Kadriu kandidatë për kryetar të Gjilanit tha se ndihet mirë që ndodhet në hapësirat e dijes dhe të studimit.”AAK do ta përkrah Universitetin e Gjilanit sepse ky ka qenë një lajm i mirë për të gjithë qytetarët e këtij regjioni. Ne jemi të interesuar që në këtë Universitet të mbretërojë dija e cilësia” tha Kadriu.

Kadriu ndryshe ka ofruar të gjitha rrugët e bashkëpunimit dhe partneritetit për Universitetin e Gjilanit sepse sipas tij ky Universitet është në fillim të rrugës dhe të punës dhe ka nevojë për përkrahje nga të gjitha grupimet dhe shtresat e shoqërisë.

Si rezultat i mos-përfundimit të punëve teknike brenda objekteve shkollore dhe pritjes së nxjerrjes së tenderit për rregullimin e ambienteve të brendshme nga ana e bordit themelues, kryetari Kadriu ka ofruar për Universitetin e Gjilanit rregullimin e tri klasave mësimore, në mënyrë që ato të jenë të gatshme për pranimin e studentëve më 1 tetor. Kjo ndihmë e ofruar e kryetarit Kadriu është mirëpritur nga bordi themelues, të cilët janë shprehur falënderues, ndërsa kanë thënë se kanë qasje të mirë ndaj njerëzve vullnetmirë, prandaj edhe e çmojnë pa masë ndihmën e ofruar nga kryetari Kadriu./rajonipress/