Kadriu: E shtuna dhe e diela duhet të jenë pushim në sektorin privat

Gjilan – Lëvizja “Vatra” kërkon që asambleistët e Kuvendit të aprovojnë vendimin me të cilin e shtuna dhe e diela të jenë pushim për punëtorët në sektorin privat! Të dielave dhe të shtunave duhet të jetë pushim në sektorin privat në Gjilan, që është e drejtë elementare e punëtorëve në gjithë Bashkësinë Europiane thotë Kushtrim Kadriu.

“Është papërgjegjësi për pushtetin si ndodhi që nga asambleistët e Kuvendit kjo pikë të shtyhet për ndonjë seancë tjetër. Këtyre nuk iu intereson për punëtorin, pasi vetë nuk kanë punuar kurrë dhe nuk e dijnë çka është puna, kurse vetë, e me babë e babagjysh kanë qenë dhe janë gjithnjë në punë të shtetit e në institucione, ku ka komoditet e zotërillëk, larg punës e angazhimit. Të tjerë të tillë kanë firma e biznese që pas lufte, e qe besa disa edhe para lufte tok me këta kojshitë me të cilët u ndamë! Ky është keqpërdorim i rëndë i klasës punëtore dhe të nëpërkëmbur gjithnjë nga padronët, dje të huajtë pushtues, e tani nga tanët, njësoj! Kjo seancë duhet të mbahet sa më shpejt që të jetë e mundur dhe se ne Lëvizja “Vatra” bashkë me asambleistët shumë do të kërkojmë mbrojtjen e të drejtave të punëtorëve në sektorin privat por edhe të të gjithë punëtorëve poshtë shoqërisë e të cilët janë themeli” ka thënë Kadriu./rajonipress/