Kadriu e Bunjaku Rexhepi u takuan me përfaqësues të KFOR-it turk

Gjilan – Nënkryetari i Komunës së Gjilanit, Rexhep Kadriu, i shoqëruar nga kryesuesja e Kuvendit, Valentina Bunjaku Rexhepi, kanë pritur sot një delegacion të KFOR-it turk, në krye me Lejtnantin e parë Sadik Ozsensoy.

Në këtë takim mes dy palëve, u fol për gjendjen e sigurisë në Komunën e Gjilanit, që u vlerësua të jetë e mirë si dhe për forcimin e bashkëpunimit me qeverinë turke.

“Marrëdhëniet tona me popullin turk janë vëllazërore. Bashkëpunimi është shumë i mirë edhe me komunitetin turk në Gjilan dhe ju konfirmoj se do t’i ndihmojmë për t’ua zgjidhur problemet e tyre. Së bashku me kryetarin Haziri ia kemi sjellë një frymë të re qeverisjes së Gjilanit në të mirë të të gjithë qytetarëve”, është shprehur me këtë rast nënkryetari Rexhep Kadriu.

Nga ana tjetër, Lejtnanti i parë Sadik Ozsensoy ka falënderuar Kadriun dhe Bunjakun Rexhepi për pritjen, ndërsa ka konfirmuar se do të ketë bashkëpunim të mirë në vazhdimësi me Komunën e Gjilanit./rajonipress/