Kadriu: AAK do ta ndalojë trendin e ikjes së të rinjve nga Kosova

Gjilan – Kryetari i AAK-së dega në Gjilan Rexhep Kadriu, tha se po punohet në strategji të reja për të rinjtë e Gjilanit dhe se do të hiqen trendët e ikjes nga Kosova apo të kërkimit të një pune të thjeshtë, sepse me fitoren e AAK-së në nëntor, do të fillojë një epokë krejtësisht e re për të ardhmen e të gjithë qytetarëve e në veçanti të të rinjve.

Aleanca e të Rinjve të Kosovës – Dega në Gjilan, ka shpërndarë libreza për 300 anëtarë të rinj. Në manifestimin, i cili u mbajt mbrëmë ku prezent ishin kryetari i AAK-së në Gjilan Rexhep Kadriu, kryetari i AAK-së Ramush Haradinaj, nënkryetari i AAK-së Ahmet Isufi si dhe kryetari i ARK-së në nivel të Kosovës Musa Preteni, u mirëpritën të rinjtë e Gjilanit, të cilët që nga dje janë edhe zyrtarisht anëtarë të AAK-së në Gjilan.

Kryetari i AAK-së – Dega në Gjilan Rexhep Kadriu, para të pranishmëve tha se po punohet në strategji të reja për të rinjtë e Gjilanit dhe se do të hiqen trendët e ikjes nga Kosova apo të kërkimit të një pune të thjeshtë, sepse me fitoren e AAK-së në nëntor, do të fillojë një epokë krejtësisht e re për të ardhmen e të gjithë qytetarëve e në veçanti të të rinjve.

Ndërsa, kryetari i ARK-së në Gjilan Labinot Hyseni, ka thënë se , Aleanca e të Rinjve në Gjilan, qysh nga themelimi i saj ka qenë gjithmonë përkrahje e madhe e proceseve politike të Aleancës dhe liderit të saj Ramush Haradinaj, ndërsa tani më shumë se asnjëherë, përkrahë kandidaturën e kryetarit të degës në Gjilan Rexhep Kadriu, për kryetar të komunës. “Këtë e tregon më së miri ky numër kaq i madh i këtyre të rinjve, të cilët nga sonte do të jenë edhe zyrtarisht pjesë e rrugëtimit tonë të përbashkët”, ka shtuar Hyseni.

Krejt në fund, të katër liderët së bashku ndanë librezat për 300 anëtarët e rinj të ARK-së në Gjilan. /rajonipress/