Kabashi bëhet me rrugë të asfaltuar, Ballanca me objekt të ri shkollor në shtator

Viti – Kryetari i komunës së Vitisë Sokol Haliti, ka inspektuar sot punimet në realizimin e projektit për asfaltimin e rrugës në lagjen Gashi në Kabash, si dhe në ndërtimin e shkollës fillore në Ballancë.

Asfaltimi i rrugës së lagjes Gashi në Kabash ka një gjatësi prej afër 1 mijë metrash dhe është projekt që realizohet nga komuna e Vitisë në bashkëfinancim më Ministrinë e Infrastrukturës.

Ndërkohë, kryetari Haliti ka vizituar edhe fshatin Ballancë, përkatësisht shkollën e këtij lokaliteti ku ka filluar faza e dytë e punimeve në finalizimin e projektit të objektit të ri shkollor.

Kjo shkollë do të ketë 6 klasë, kabinetin e informatikës, bibliotekën, si dhe në kuadër të këtij projekti do të rregullohet edhe oborri dhe kopshti. Sipas planit të paraparë, parashihet që punimet të përfundojnë brenda dy muajve dhe kështu viti i ri shkollor në shtator të filloj në objektin e ri.

Aktualisht mësimet në objektin e vjetër të shkollës po i ndjekin 96 nxënës nga klasa e parë e deri në të nëntën dhe mësimi zhvillohet në dy ndërrime, ndërkaq pritet që në objektin e ri mësimi të zhvillohet vetëm në një ndërrim. /rajonipress/