Ka shkelur ligjin, kosovari duhet të lëshojë Zvicrën

Për shkak të brutalitettit që ka treguar, “ekziston një interes i madh në aspektin e sigurisë që ai të mbahet larg Zvicrës”, thuhet në vendimin e Gjykatës Federale.

Gjykata Federale ka refuzuar në tri raste të ndara ankesat e personave me shtetësi të huaj kundër vendimeve të shkallëve më të ulëta të gjyqësisë për dëbimin e tyre nga Zvicra. Në mesin e tri rasteve është edhe ai i kosovarit 26 vjeçar i cili kishte ardhur në Zvicër me familjen e tij në vitin 1998 gjatë luftës së Kosovës.

Që në moshën 17 vjeçare, kur bënte zanatin si automekanik, ai kishte kryer vjedhje të ndryshme për çka dhe ishte dënuar. Kanë pasuar pastaj edhe dy dënime me nga më shumë se dy vjet heqje lirie, veç tjerash për lëndim të rëndë trupor dhe për vjedhje të rëndë në tetë raste, shkruan azonline.ch.

Si rezultat, zyra për migracion e Soloturnit ia ka tërhequr atij në tetorin e vitit 2012 lejen e përhershme të qëndrimit në Zvicër (vizën C). Ky vendim ishte mbështetur edhe nga Gjykata Administrative Federale, dhe tash së fundi, pas ankesës së bërë, atë e ka vërtetuar edhe shkalla më e lartë, Gjykata Federale në Lozanë.

Sipas vendimit të kësaj gjykate, i riu nga Kosova ka qenë brutal dhe ka vepruar në mënyrë të paskrupullt. Prandaj “ekziston një interes i madh në aspektin e sigurisë që ai të mbahet larg Zvicrës. Në këto rrethana, kthimi i të riut beqar 26 vjeçar në Kosovë është i i realizueshëm”, thuhet veç tjerash në vendimin e Gjykatës Federale të Zvicrës. /albinfo/