Ka nisur asfaltimi i rrugës Viti – Mogillë

Viti – Ka filluar sot solemnisht projekti për asfaltimin e rrugës Viti-Mogillë, projekt ky që do të realizohet në bashkëfinancim të Ministrisë së Administrimit të Pushtetit Lokal dhe komunës së Vitisë. Në inaugurimin e këtij projekti ku ishin të pranishëm udhëheqësit e komunës së Vitisë dhe asaj të Kllokotit, u vlerësua ky projekt si tejet i rëndësishëm për faktin se lidh banorët e Mogillës me qytetin e Vitisë dhe bënë më të lehtë qarkullimin përgjatë kësaj rruge.

Kryetari i komunës së Vitisë Sokol Haliti, ka theksuar se kjo rrugë ka rëndësi se lidh dy komunat, dy vendbanimet Vitinë me Mogillën por edhe me Ramnishtën dhe shumë e rëndësishme edhe për ne por edhe për komunën e Kllokotit, si bashkëpunim ndërkomunal. “Është një projekt që do të kushtoj 200.000 euro dhe komuna e Vitisë do të marrë pjesë në bashkëfinancim me 98.000 mijë euro ndërsa pjesa tjetër nga MAPL-ja. Natyrisht që është një rrugë më e shkurtë për qarkullim të qytetarëve si në ekonomin familjare po ashtu edhe në atë bujqësore, dhe për këtë ka efektin e lartë pasi që edhe lidhë edhe fshatin Ramnishtë me këtë rrugë”, tha kryetari Haliti.

Ndërsa zv. kryetari i komunës së Kllokotit Hasan Rashiti, falënderoj kryetarin e komunës së Vitisë për kontributin që po jep jo vetëm në zhvillimin infrastrukturorë në komunën e Vitisë por edhe në atë të Kllokotit. “Ne kemi një bashkëpunim të shkëlqyeshëm me komunën e Vitisë jo vetëm në realizim të projekteve por edhe në sfera të tjera që na mbështet sidomos në zyrën e projekteve, atë të auditimit, shërbimet e Njësisë së Zjarrëfikjes etj, të cila i mungojnë komunës së Kllokotit. Edhe kur kemi nis këtë projekt, kemi qenë në Ministrinë e Administrimit të Pushtetit Lokal dhe në emër të strukturave të komunës së Kllokotit i falënderoj sepse ky projekt është shumë i mirëseardhur për qytetarët e Mogillës që po lidhen me komunën amë të Vitisë, sepse ka vite të tëra që kjo rrugë ka qenë e pa qarkullueshme”, tha Rashiti./rajonipress/