Ka ndërruar jetë Vehbi M. Bislimi, punëtor ndihmës i paraleleve të gjimnazit në Zhegër

Zhegër – Dje, në fshatin Zhegër, komuna e Gjilanit, në moshën 66-vjeçare, ka ndërruar jetë Vehbi M. Bislimi, punëtor ndihmës në paralelet e ndara të Gjimnazi në Zhegër. Vehbi Bislimit është varrosur sot, më 4 dhjetor në Zhegër.

Ky zhegras është një pjesë e shkollës së arsimit shqip në kohën e okupimit serb. Siç dihet, kur okupuesi i ndaloi shkollarët e paraleleve të gjimnazit të punojnë nën kulmin e shkollës fillore “Agim Ramadani”, tetë paralele të gjimnazit u detyruan që procesin e rregullt mësimor ta zhvillojnë nëpër ashtuquajtura Shtëpi-Shkolla të këtij lokaliteti. Pra, gjatë viteve 1991-92 e më vonë, disa qytetarë të këtij lokaliteti liruan disa shtëpi, në të cilat është organizuar procesi mësimor për nxënësit e Gjimnazit të këtij lokaliteti të Malësisë së Karadakut.

I pari ishte Sadri Bajrami, arsimtari i gjeografisë, i cili, për shkak të kushteve të vështira ekonomike, ai u detyrua të mërgojë në botën e jashtme, në Zvicër. Ai (Sadriu), atë kohë liroi dy shtëpi me 5 dhoma mësimi. Pos Sadriut, në Zhegër shtëpitë i liruan për gjimnazistët edhe disa edhe disa qytetarë të tjerë të këtij fshati. Në shtëpinë e Sadri Bajramit, punëtor ndihmës qe i caktuar Vehbi Bislimi nga ky fshat. Një njeri shumë punëtor. Profesorëve ju dha bukë dhe i strehoi në shtëpinë e tij vetëm e vetëm që të mos mungojnë nga orët mësimore.

Ky, me ato mundësi të veta skamnore, disa herë, profesorët udhëtarë i ka marrë në shtëpi, jo vetëm për ushqim, por edhe për strehim. Ai nuk ka kursyer asgjë nga veti për shkollën shqipe. Të gjitha punët i ka kryer me pedantëri. Ka qenë organizator i mirë i punës të këtyre paraleleve të ndara të Gjimnazit qendër “Zenel Hajdini” në Gjilan. Tek ky qytetar, që sot mungon, kanë banuar dy arsimtarë” Adem Lipovica dhe Berat Kosumi. I pari ka udhëtuar nga Dardana (Kamenica), ndërsa i dyti ka udhëtuar nga Presheva.

Vehbi Bislimi qe një punëtor i madh i lidhur me procesin mësimor. Ai shpeshherë i mirrte ditarët e punës dhe i strehonte në shtëpinë e tij për të mos rënë në duar policisë serbe, e cila, shpeshherë i vizitonte këto paralele të shkollarëve tanë. Pra, Vehbi Bislimi qe një punëtor i madh i shkollës shqipe. Ndonëse punoi mjaft shumë, askujt nuk i shkoi mendja që t’i dali në ndihmë së paku një përkrahje morale. Vehbi Bislimi vdiq, por ai përkujtohet jo vetën në analet e shkollës shqipe si pjesë e pandashme e arsimit shqip, por edhe nga shkollarët e kësaj kohe që mësuan nën kulmet e Shtëpi-shkollë.

Sot, zhegrasit u ndanë nga ky punëtor i madh, i cili, gjer sa erdhi lufta e fundit 1999, ai punoi së bashku me punëtorët e arsimit në këto paralele të Gjimnazit të Zhegrës në vitet e rënda të okupimit serb. Sot, para shumë vendasve dhe familjarëve, Vehbi Bislimi u varros në varrezat e këtij fshati. I lehtë i qoftë dheu!/ tefik selimi/rajonipress/