Jonuz Musliu takon Ramadan Ilazin dhe Valdet Sadikun

Në selinë e Këshillit Kombëtar Shqiptar (KKSH), kryetari Jonuz Musliu, priti në një takim pune zëvendës Ministrin e Integrimeve Evropiane të Republikës së Kosovës, Ramadan Ilazi dhe Ambasadorin e Republikës së Kosovës në Beograd, Valdet Sadiku.

Gjatë takimit u bisedua për forcimin e bashkëpunimit rajonal në kontekst të procesit të integrimit evropian, me ç’rast u konstatua se Serbia dhe Kosova kanë një të ardhme të përbashkët në kuadër të Bashkimit Evropian.

“Kjo është vizita e parë në Luginë të Preshevës nga një anëtarë i ekzekutivit të Qeverisë së Kosovës, për çfarë ne falënderuam zv/Ministrin Ilazi dhe i shprehëm mirënjohje për interesimin e tij edhe rreth këtij rajoni” theksoi kryetari Musliu.

Gjatë takimit delegacioni i Kosovës theksoi se Qeveria e Kosovës është e interesuar për të promovuar bashkëpunimin sa më të afërt ndërmjet 2 shteteve tona. Në ketë drejtim, ne jemi të interesuar për të përgatitur projektet e përbashkëta për mbështetje në kuadër të Programit për Bashkëpunim Ndërkufitar të fondeve të BE-së. Projektet e tilla do të promovojnë bashkëpunimin ndërmjet komuniteteve që jetojnë në 2 anët e kufirit dhe do të kontribuojnë në përafrimin edhe më të madh kulturor, ekonomik dhe social.

Vlen të theksohet se vizitat e zyrtarëve qeveritar dhe shkëmbimi më i madh ndihmojnë në normalizimin e marrëdhënieve dhe adresimin e sfidave të ndryshme përmes dialogut thuhet në njoftimin e KKSH./rajonipress/