Januzaj s’e harron Man Unitedin: Është ende ekipi im i dytë

Përkundër që tani është duke luajtur për Real Sociedad dhe ka kohë të gjatë që kur është larguar nga Old Traffordi, Adnan Januzaj ka bërë të ditur se ende e mban në zemër ish-klubin e tij.

Adnan Januzaj iu bashkua Djajve të Kuq në vitin 2011, ndërsa kaloi te ekipi i parë në vitin 2013. Ai ishte në stol për ndeshjen e fundit të Sir Alex Fergusonit para pensionimit, ndërsa debutoi kur David Moyes e mori drejtimin e skuadrës, transmeton Gazeta Express.

Nën Moyes, Januzaj arriti ta fitojë dashurinë e tifozëve dhe një vend në formacionin e parë, megjithatë kur erdhi Louis Van Gaal ai luajti më pak dhe pasi kaloi në Dortmund dhe Sunderland në huazim, u transferua përfundimisht në Real Sociedad.

E përkundër që ka tre vjet që është shitur përfundimisht nga Manchester Unitedit, Januzaj vazhdon ta mbajë në zemër ish-klubin e tij.

“Manchester Unitedi është ekipi im i dytë, pas Real Sociedadit”, e pranoi Januzaj, në një intervistë të dhënë për gazetën spanjolle AS.

Kur u pyet për lojtarin më të mirë në botë, Januzaj e zbuloi edhe dashurinë e tij për njërin ndër ish-bashkëlojtarët e vet.

“Për mua, lojtari më i mirë është Cristiano Ronaldo, por i preferuari im është Paul Pogba sepse unë jam rritur duke luajtur me të”, shtoi Januzaj. /Gazeta Express/