Januzaj: Moyesit i duhet kohë

Manchester- Mesfushori i Manchester United, Adnan Januzaj beson se menaxheri David Moyes do të ketë sukses në Old Trafford vetëm nëse i jepet kohë.

Që nga debutimi tij në ekipin e parë në muajin gusht, talenti kosovar ka luajtur rregullisht nën urdhrat e ish-trajnerit të Evertonit, duke shënuar dy gola në 10 paraqitje për klubin në Premier League.

Megjithatë, Moyes është përballur me vështirësi, prejse zëvendësoi Sir Alex Fergusonin këtë verë, duke mbetur në pozitën e tetë me 10 pikë prapa Arsenalit që është lider në ligën angleze, por Januzaj ka porositur fansat që të kenë durim.

“Ai do të fitojë trofe”, ka thënë 18-vjeçari për kanalin zyrtar të klubit “MUTV”. “Mos harroni, ai është trajner i ri. Çdo gjë është e re. Ju duhet t`i jepni kohë”.

“Mendoj se ai është një trajner i mirë. Të gjithë lojtarët janë gati për të punuar shumë dhe gjërat e mira do të vijnë”, ka shtuar ai.

Januzaj, i cili arriti në United në vitin 2011 nga akademia e Anderlechtit, ka thënë se dëshiron të qëndrojë për shumë kohë në Old Trafford.

“Jam i lumtur këtu. Kur unë u transferova në Manchester United dëshirova të luaj me ekipin e parë. Tani dua të qëndroj këtu, të luaj për shumë kohë dhe nëse mundem të jem edhe lojtari më i mirë”.