Januzaj duhet ta zëvendësojë Rooneyn

Adnan Januzaj ka pasur hapësira të pakta në fillim të këtij sezoni. Mesfushori kosovar nuk është njëra prej zgjedhjeve të trajnerit Louis van Gaal.

Mirëpo, uebfaqja ‘squawka.com’ ia ka kushtuar një shkrim të veçantë përfaqësuesit belg, për të cilin thotë se e meriton të luajë nga minuta e parë, në duelin e ardhshëm të Manchester Unitedit.

Në fakt, Wayne Rooney është i suspenduar, pas kartonit të kuq që e mori në ndeshje me West Hamin, ndërsa trajneri holandez është në dilemë se me kë ta zëvendësojë për duelin e fundjavës ndaj Evertonit.

Ka gjasa që në vend të tij të luajë Juan Mata, por kështu nuk mendon edhe kjo uebfaqe, e cila insiston se ky do të ishte rasti ideal për 19 vjeçarin, që së fundmi luajti me ekipin U-21 të “Djajve të Kuq”.

Januzaj luajti më shpesh sezonin e kaluar, nën drejtimin e Davis Moyes, por Van Gaal preferoi futbollistë të tjerë këtë edicion.