Janë bërë të gjitha përgatitjet për shënimin e 5 vjetorit të Pavarësisë së Kosovës

Gjilan – Komuna e Gjilanit, respektivisht drejtoria për Kulturë, Rini dhe Sport ka bërë të gjitha përgatitjet dhe itinerarin e aktiviteteve për shënimin e 17 shkurtit – 5 vjetorin e shpalljes së Pavarësisë së Kosovës.

Aktivitetet përfshijnë homazhe në varreza të dëshmorëve dhe lapidarët në qytet, ekspozitë në fotografi nga dita e shpalljes së pavarësisë, koncert i muzikës popullore nga ansambli i këngëve dhe valleve popullore “Shota”, turneu i basketbollit në karroca, koncert për fëmijë dhe në mbrëmje mbyllet me një koncert festiv me solistët e qytetit para Teatrit të Qytetit të Gjilanit.

Drejtori i kësaj drejtorie, Veton Nevzadi ka thënë se drejtoria të cilën ai e drejton pos shumë aktiviteteve të ngjeshura që ka, një kohë të veçantë i kushton edhe shënimit të kësaj feste dhe të gjitha festave të tjera shtetërore, kombëtare por edhe ditëve të veçanta ndërkombëtare të cilat bien në sektorin e kulturës.

Sa i përket shënimit të ditës së Pavarësisë së Kosovës, drejtoria e kulturës aktivitetet i fillon nga data 16 shkurt ku është e paraparë një ekspozitë e fotografive nga Dita e Shpalljes se Pavarësisë që mbahet në ora 10:00 në sheshin para Teatrit të qytetit, ndërsa koncerti i muzikës popullore nga ansambli “Shota” mbahet në sallën e teatrit në ora 18:00 dhe kështu përfundojnë aktivitetet në ditën e parë. Dita e dytë e festës, pra dita e shpalljes së Pavarësisë në ora 10:00 nis me homazhe në varrezat e dëshmorëve dhe tek lapidarët në qytet, pastaj në ora 11:00 është organizuar një turne i basketbollit me karroca, në orën 11:00 mbahet një koncert për fëmijë, nga ansamble dhe Grupe të fëmijëve të qytetit dhe përmbyllet me koncertin e madh festiv nga ansamblet dhe solistët e qytetit që pritet të filloj në ora 18:00.

Me këtë rast, Komuna e Gjilanit, uron të gjithë qytetarët për 5 vjetorin e Shpalljes së Pavarësisë së Kosovës./rajonipress/