Jakup Krasniqi tregon se si duhet të zgjidhen problemet e Kosovës

Ish-kryetari i Kuvendit të Kosovës, Jakup Krasniqi mendon se problemet në të cilat është katapultuar Kosova, mund t’i zgjidhin vetëm zgjedhjet e reja dhe një “zgjim qytetar”.

Krasniqi në profilin e tij në Facebook, shkruan se nuk ka dyshim që Mali i Zi e kundërshton rivlerësimin e marrëveshjes për demarkacion, pasi një gjë të tillë po e bëjnë edhe zyrtarët e shtetit të Kosovës, që e kanë për detyrë ta mbrojnë atë.

Ky është postimi i plotë i Krasniqit:

KUNDËRSHTIMIN E MALIT TË ZI PËR DEMARKACIONIN AS QË DUHET BËRË LAJM

Pse?

Kur Kryeministri i vendit dhe Ministrat e Kabinetit Qeveritar me Presidentin e vendit janë kundër rishikimit dhe krijimit të një Komisioni të ri për një rivlerësim, pse duhet të na habis kundërshtimi i Malit të Zi i cili ka fituar mbi 8200 hektarë?!

Fatkeqësisht, papërgjegjësia nuk qëndron vetëm të te apostrofuarit, ndonëse ata e kanë përgjegjësin për të mbrojtur tërësinë territoriale e sovranitetin e vendit (shtetit), por të të gjithë përfaqësuesit e zgjedhur nga qytetarët votues të Republikës sonë. Madje, nga përgjegjësia morale e politike, nuk mund të jenë të liruar asnjë komunitet i organizuar i shoqërisë shqiptare në Kosovë, këtu përfshihen edhe mediat si pushtet i katërt.

Nga kjo që u tha mund të përfundojmë se: Problemet në shoqërinë tonë janë më të thella sesa i prezantojmë në medie! Këto probleme mund t’i zgjidhë vetëm një zgjim qytetarë në zgjedhje të reja e demokratike, të cilat le të quhen si do, të parakohshme apo të jashtëzakonshme! Pak ka rëndësi! E rëndësishme është të ndodh ndryshimi!

Vendi duhet të qeveriset nga ata që e duan shtetin dhe kombin! E jo nga ata që për interesa të vetat krejt personale i sakrifikojnë interesat e Atdheut e të kombit!