Jahjaga sodit bllokadën

Opozita e kushtëzon koalicionin me anulimin e marrëveshjeve të Brukselit. Presidentja nuk po e ushtron autoritetin e saj kushtetues

“Presidentja Jahjaga e ka postin dhe përshkrimin e punës, por jo edhe kredibilitetin moral e politik për të drejtuar një tryezë të tillë. Një tryezë të tillë do të mund ta drejtonin vetëm ambasadorët e Quintit”, tha analisti Nexhmendin Spahiu për “Kosova Sot

Derisa përplasjet mes pozitës dhe opozitës duket që do të vazhdojnë ta mbajnë edhe për një kohë të gjatë peng punën e institucionit më të lartë përfaqësues të shtetit, Kuvendit të Kosovës, pas seancës së kaluar me hedhjen e vezëve kundër kryeministrit dhe paralajmërimin e vazhdimit të pengimit të punës së Kuvendit, njerëz të politikës, analistë dhe përfaqësues të shoqërisë civile, kërkojnë që pa ndonjë vonesë e para e vendit të reflektojë pozicionin e vet kushtetues, të faktorit unifikuar politik, dhe së bashku me partitë politike të ofroj alternativën e daljes nga kriza.

Deputeti i LDK-së, Adem Salihaj, është shumë skeptik se e para e vendit do të mundë të ketë sukses në realizimin e këtij objektivi, pasi dyshon që ky skenar i destabilizimit të punës së institucioneve të shtetit mund të jetë skenar i marrëveshjes së fshehtë PDK – ‘Vetëvendosje’ për ta rrëzuar Qeverinë e kryesuar nga LDK-ja dhe Isa Mustafa, për ta ndryshuar koalicionin ose çuar vendin në zgjedhje të reja.