Jahjaga: S’lejojmë që Kosova të bëhet strehimore e radikalizmit

Presidentja e Kosovës, Atifete Jahjaga ka takuar krerët e institucioneve të sigurisë së Kosovës për të diskutuar kërcënimin nga ekstremizmi dhe radikalizmi në vend dhe masat e ndërmarra nga këto institucione, për të parandaluar dhe luftuar këtë dukuri të papranueshme.

Jahjaga ka kërkuar që të trajtohet me prioritet dhe në bashkërendim ky kërcënim ndaj sigurisë së Kosovës, rajonit dhe më gjerë, dhe që në bashkëpunim me partnerët strategjikë të parandalohet që Kosova të bëhet eksportuese e këtij kërcënimi global.

Jahjaga theksoi se Kosova në asnjë moment nuk do të lejojë që të bëhet burim i ekstremizmit e strehimore e kriminelëve që nxisin terror dhe urrejtje. Ajo i ka ftuar të gjithë qytetarët e Kosovës e komunitetet fetare që të bashkëpunojnë me autoritetet vendore dhe mekanizmat e sigurisë, për t’i përndjekur penalisht individët që qëndrojnë prapa këtyre përpjekjeve për të destabilizuar Kosovën dhe traditën e saj të gjatë të harmonisë ndërfetare.

“Ne duhet të distancohemi nga këto akte mizore të kriminelëve, dhe ata duhet t’i denoncojmë dhe t’i trajtojmë si të tillë”, thuhet në njoftim. /Telegrafi/