Jahjaga shefave të partive politike: Ndërtoni shpejt institucionet

Presidentja e Kosovës, Atifete Jahjaga edhe njëherë ka treguar se ka kërkuar nga liderët e partive politike që të gjejnë një zgjidhje dhe ta nxjerrin vendin nga situata e krijuar. Ajo në një deklaratë publike ka thënë se liderët duhet të gjejnë gjuhë të përbashkët. Në këtë deklaratë po ashtu është treguar se Presidentja ka kërkuar çdo herë zgjidhje brenda vendimeve të Gjykatës Kushtetuese.

Kjo është deklarata e plotë e Presidencës:

Presidentja Jahjaga gjithnjë ka theksuar se zgjidhja kërkohet brenda Kuvendit të Kosovës, ashtu siç e parasheh edhe vendimi i Gjykatës Kushtetuese dhe vetë kuadri kushtetues, e që buron nga mandati i deputetëve të Kuvendit.

Duke kërkuar ruajtjen e rendit kushtetues, ruajtjen e mirëqenies së qytetarëve të vendit dhe gjithashtu duke konsideruar se përgjegjësia institucionale ndaj obligimeve ndërkombëtare, është jetike për vendin, Presidentja Jahjaga ka kërkuar nga liderët e partive politike që të gjejnë gjuhën e përbashkët, përmes dialogut, si kulturë elementare në demokraci dhe ta nxjerrin vendin nga kjo situatë e krijuar.

Ndërtimi i shpejtë i institucioneve të qëndrueshme është në interes të vendit dhe gjithsesi se përfshirja në institucione nënkupton respektimin e Kushtetutës së Kosovës, rrjedhimisht përfshirjen etnike.