Jahjaga: Po ruaj paanësinë

Ndonëse ende nuk kanë dhënë ndonjë rezultat konkret, Presidentja Atifete Jahjaga, tha se takimet e sotme me liderët e partive politike parlamentare, janë pjesë e procesit lehtësues të diskutimeve që po bëhen me qëllim të ofrimit të zgjidhjeve të qëndrueshme për ndërtimin e institucioneve dhe bazuar në gjithë kuadrin kushtetues të vendit.

Pas takimit me krerë të PDK-së, Nismës e Vetëvendosjes, ajo tha se do të vazhdojë që të luaj rolin e unitetit të popullit, duke ruajtur paanësinë nga çdo ndikim partiak dhe duke ndihmuar që të ndërtohen institucione të qëndrueshme të shtetit, që do të marrin përsipër obligimet dhe përgjegjësitë për proceset në të cilat ndodhet vendi.

Presidentja tha se në rolin e saj kushtetues të garantuesit të funksionimit demokratik të institucioneve kërkon nga liderët e të gjitha partive politike parlamentare dhe nga deputetët e Kuvendit të Kosovës, që të gjejnë zgjidhje më shpejt për ndërtimin e institucioneve të qëndrueshme në vend, për të shmangur çdo mundësi të futjes së vendit qoftë në krizë më të thellë, qoftë në zgjedhje të parakohshme.

Takimet e Presidentes Jahjaga, në kuadër të procesit lehtësues me liderët e partive politike parlamentare, me kryetarin e LDK-së, zotëri Isa Mustafa si dhe me kryetarin e AAK-së, zotëri Ramush Haradinaj, do të zhvillohen të enjten.
© KOHA.net

Shpërndaje.
© RAJONIPRESS