Jahjaga: Po ndërtojmë shtetin ku institucionet janë zgjidhje

Ajo ka thënë se Austria ka qenë pjesë e pandashme e historisë më të re të Kosovës, të përfshirë në dhënien fund të dhunës dhe luftës, në ndërtimin e një Kosove më ndryshe, më gjithëpërfshirëse, më demokratike, më të përparuar – një shtet i ndërtuar mbi parimin e drejtësisë.

Presidentja e Kosovës, Atifete Jahjaga, ka marrë pjesë në shënimin e Ditës Kombëtare të Austrisë në Kosovë, që nënkupton shënimin e 60-vjetorit të pavarësisë dhe të deklarimit të neutralitetit të përhershëm të Austrisë.

Në fjalën e saj para të pranishmëve, Jahjaga ka thënë se në këtë ditë ne po e vlerësojmë përkushtimin e saj për paqen, sigurinë dhe demokracinë si vlera të çmuara të shoqërive kudo në botë.

Mbi të gjitha, në këtë përvjetor të neutralitetit të përhershëm të këtij vendi, Kosova çmon dedikimin e këtij vendi në ndihmë të ndërtimit të mirëkuptimit ndërmjet njerëzve dhe popujve.

“Në kufi me Ballkanin Perëndimor dhe e afërt me këtë pjesë të Evropës, Austria e ka kuptuar më së miri jo vetëm historinë e dhimbshme të rajonit, por edhe përpjekjen për t’u bërë pjesë e pandashme e kombeve të lira në një familje evropiane. Austria ka qëndruar afër nesh për të na ndihmuar në rrugëtimin jo aq të lehtë të ndërtimit të paqes”, ka thënë presidentja e vendit.

Ajo ka thënë se Austria ka qenë pjesë e pandashme e historisë më të re të Kosovës, të përfshirë në dhënien fund të dhunës dhe luftës, në ndërtimin e një Kosove më ndryshe, më gjithëpërfshirëse, më demokratike, më të përparuar – një shtet i ndërtuar mbi parimin e drejtësisë.

E para e vendit tha se Austria ka qenë shembull jo vetëm i mikpritjes, në kohë paqeje, gjatë bisedimeve për statusin e Kosovës, të përpjekjeve për ta bërë Kosovën të mëvetësishme, demokratike dhe përgjegjëse për fuqizimin dhe avancimin e të drejtave për të gjithë qytetarët e saj.

“Austria është pjesë e pandashme e bashkësisë ndërkombëtare, që ndan suksesin e Kosovës së re së bashku me popullin dhe institucionet e saj. Një Kosove të përkushtuar për të qenë pjesë e arkitekturës globale të sigurisë, besnike e vlerave të përgjithshme për paqe dhe zhvillim dhe kontribuuese në nismat për ndihmë atyre që sot bredhin rrugëve të botës, të shpërngulur me dhunë nga vendet e tyre”, theksoi më tej Jahjaga në fjalën e saj.

Kreu i shtetit të Kosovës tha se Austria edhe sot, kur po e testojmë demokracinë tonë, kur po e sfidojmë kushtetutën tonë e njëkohësisht po piqemi politikisht – na qëndron sërish pranë, si miq dhe përkrahës, të bindur se problemet në tranzicionin tonë mund të tejkalohen me dialog dhe mirëkuptim, duke ndërtuar ura bashkëpunimi dhe duke punuar fort në ndërtimin e një shteti të së drejtës, që shmang rrugën si zgjidhje por që ofron zgjidhjen brenda vetë institucionit.

Ndërkaq Jahjaga në fund ka falënderuar ambasadorin austriak në Kosovë, Johann Brieger, i cili pritet të largohet nga Kosova shumë shpejtë pas vitesh shërbimi këtu, të cilit i tha se Kosova është shumë e nderuar me prezencën e tij që ka ndihmuar në ruajtjen dhe forcimin e marrëdhënieve ndërmjet dy kombeve tona.

“Puna dhe përkushtimi juaj në fuqizimin e lidhjeve ndërmjet dy vendeve tona, ju ka bërë mikun më të mirë të qytetarëve të Kosovës. Ju do të ikni nga Kosova së shpejti, pak ditë pas vizitës zyrtare të mikut tim dhe të Kosovës, Presidentit Fischer të Austrisë, por besoj se do të mbani në kujtesë dhe në zemër këtë vend. Le ta ngremë një dolli për Ambasadorin Brieger dhe le të besojmë se kjo nuk është një lamtumirë për të meqë Kosova do ta mbajë në mend si mikun e saj kudo që të jetë”, ka përfunduar presidentja Atifete Jahjaga.