Jahjaga: Kushtetuta e Kosovës simbolizon sakrificën për liri e pavarësi

Presidentja e Republikës, Atifete Jahjaga ka thënë se Kushtetua e Kosovës është simbol i sakrificës së popullit të Kosovës për liri e pavarësi.“Sot është dita që simbolizon bazën e shtetësisë. Sot kremtojmë një ndër ditët më të shënuara në historinë e shtetit tonë, Ditën e Kushtetutës, këtij akti madhor që ka përmbledhur gjithë sakrificën sublime të popullit të Kosovës për liri dhe pavarësi”, ka thënë Jahjaga, në urimin e saj për Ditën e Kushtetutës.

Ajo ka thënë se me vullnetin e qytetarëve dhe sakrificën e tyre po ndërtohet një shtet i dinjitetshëm dhe i përparuar.

“Ky dokument është themeli i shtetit të Kosovës – që qytetarin e tij e ka zot të kësaj toke, të barabartë pa dallim. Është dokumenti që ndërton bazamentin e shtetit të së drejtës, ku sundon rendi dhe ku forca e ligjit shtrihet në gjithë territorin. Kjo është Dita e aktit më të lartë juridik dhe të vlerave të popujve dhe vendeve demokratike”, ka shtuar Shefja e Shtetit.

“Një Kushtetutë e shtetit tonë, me një histori të rëndë, që po ngritet me forcën e shpirtit të qytetarëve të tij, me vullnetin e tyre për ta bërë Kosovën një vend të dinjitetshëm, të përparuar dhe anëtare të barabartë të bashkësisë ndërkombëtare”.

“Urime Dita e Kushtetutës, qytetarë të Republikës së Kosovës”.