Jahjaga jep dorëheqje në shtator?

Presidentja Atifete Jahjaga do të largohet menjëherë pas fuqizimit të ndryshimeve kushtetuese, të cilat parashikojnë zgjedhjen e të parit të vendit drejtpërdrejt nga vota e qytetarëve, ka thënë burime të gazetës “Tribuna Shqiptare”, në Ekzekutivin e vendit.

Theksohet se Jahjagës do t’i ofrohej një post ministror si ‘kompensim’ për lëshimin e postit presidencial. Analisti Shkelzen Maliqi mendon se nuk mund të parashikohet nëse do të ndodhë diçka e tillë.

Megjithatë, sipas tij, ka mundësi që të ndodhë për shkak se presidentja nuk mund të jetë në gjendje të përballojë presionin e madh nga të gjitha anët për t’u larguar dhe për ta respektuar marrëveshjen ndërmjet liderëve dhe Rezolutën e Kuvendit.

Ndërsa, analisti tjetër politik, Nexhmedin Spahiu, ka thënë se presidentja është vendosur nga ambasada amerikane, prandaj ajo mund të hiqet vetëm atëherë kur amerikanët binden se duhet hequr.