Jablanoviq, ministër “i huaj” në Kosovë

Autoritetet e Kosovës nuk posedojnë asnjë të dhënë personale të liderit të Listës Serbe, Aleksandar Jablanoviq. Kjo nuk ka bërë pengesë për kryeministrin Isa Mustafa që ta bëjë atë ministër për Komunitete e Kthim.

Në këtë mandat, përpos Jablanoviqit, pjesë e qeverisë është edhe zëvendëskryeministri Branimir Stojanoviq, dhe ministri i Administrimit të Pushtetit Lokal, Ljubomir Mariq. Edhe këta dy janë zyrtarë të Listës Serbe, subjekt politik që mban lidhje të forta me Serbinë dhe që nuk njeh shtetësinë Kosovës, shkruan “Koha Ditore”.

Duke u bazuar në burime jozyrtare, tri ditë më parë, gazeta ka raportuar se anëtarët serbë të kabinetit qeveritar nuk posedojnë dokumente personale të Republikës së Kosovës dhe se njëri nga ta nuk ka as shtetësi kosovare. Qeveria, por edhe vet ata, nuk e patën dëshmuar të kundërtën.