Ja për çka u morën vesh Mustafa e Vuçiq në Bruksel

Pas një takimi disa orësh në Bruksel, kryeministri i Kosovës Isa Mustafa dhe ai i Serbisë Aleksandar Vuçiq, firmosën marrëveshjen për drejtësinë. Por, marrëveshja e nënshkruar nuk ishte e vetmja çështje që u diskutua në takimin e së hënës në Bruksel.

Televizioni Rrokum, nga një zyrtar i lartë koalicionit qeveritar, ka marrë vesh se Mustafa e Vuçiq kanë arritur marrëveshje edhe për disa çështje të tjera.

Zëvendës-shefi i Agjencisë Kosovare për Inteligjencë, do të jetë serb, madje ai duhet të jetë patjetër i pranueshëm edhe nga qeveria e Beogradit.

Kjo është njëra prej marrëveshjeve të arritura.

Po ashtu Televizioni Rrokum merr vesh se Gjykata në veri të Kosovës do t’i ketë 18 gjyqtarë, ndërsa 50 për qind e tyre kanë me qenë të komunitetit serb dhe 50 për qind shqiptarë.

Por, marrëveshja e firmosur në Bruksel, kërkon që për të gjithë gjyqtarët, dritën e gjelbër ta jep qeveria serbe.

Mustafa e Vuçiq, sipas këtij zyrtari kanë folur edhe për Asociacionin e Komunave Serbe, duke arritur edhe pajtueshmëri.

Me këtë marrëveshje Asociacioni i Komunave Serbe do ta ketë mbikëqyrjen mbi gjyqtarët serbë dhe do të ketë kompetenca ekzekutive.

Po ashtu është arritur marrëveshje që Lista Serbe të vazhdojë të jetë pjesë e koalicionit me PDK-në e LDK-në, transmeton TV Rrokum.