Ja çfarë shkruajnë mediet italiane për paraqitjet e Rrahmanit, Kumbullës dhe Strakoshës

Sfida e sotme midis Lazios dhe Veronës ishte një betejë e vërtetë në fushë, por pa fitues duke i lënë të dyja ekipet të kënaqura me një barazim.

Megjithëse bardhekaltrit u nisën si favoritë për ta fituar këtë takim, fati dhe vendosmëria e portierit të Veronës, Silvestri bënë që kryeqytetasit t’i lëshonin terren Interit në renditje duke u dorëzuar vendin e dytë.

Në këtë takim u aktivizuan dhe tre futbollistët shqiptarë Strakosha, Kumbulla dhe Rrahmani.

Gardiani kuqezi u vlerësua pozitivisht nga mediat italiane për dy pritjet deçizive në pjesën e parë dhe të dytë duke u rikthyer në formën e mëparshme.

Kapiteni i Kosovës Amir Rrahmani realizoi një paraqitje mbresëlënëse duke markuar më së miri golashënuesin më të mirë të Europës Ciro Immobile, i cili nuk arriti të shënonte në këtë takim, transmeton “Panorama Sport”.

Ndërsa qendërmbrojtësi kuqezi Marash Kumbulla vuajti shumë në aspketin fizik gjatë markimit të Caisedos.

Ja vlerësimet e mediave sportive italiane për 3 lojtarët shqiptarë në takimin Lazio-Verona.

Tomas Strakosha (6.5) – Vendimtar në të paktën dy raste. Në pjesën e parë ndali Pesinën, në të dytën Borinin. Shumë i qetë në ndërhyrjet e tjera duke u kthyer në nivelet e larta.

Amir Rrahmani (6.5) – Jemi mësuar me vendosmërinë e tij, përballoi më së miri Imobilen me jo pak vështirësi. Sot ai mbeti thatë.

Marash Kumbulla (6) – Pati vështirësi në aspektin fizik dhe teknik në duelet me Kaisedon. Megjithatë, e ruan balancën.