Itali, përplaset për vdekje një 26-vjeçar shqiptar

Një emigrant nga Shqipëria që jetonte dhe punonte në Itali, ka humbur jetën në një aksident rrugor. Redis Rosa, 26 vjeç, i cili punonte në një fermë në Foggia, është përplasur për vdekje nga një automjet tip “Peugeot” në rrugën që lidh Foggia-n me Borgo Tavernola-n.

Policia ka bërë të ditur se, 26-vjeçari u gjet në një rrugë në periferi të Foggia-s pasi vëllai i tij kishte dhënë alarmin pasi nuk e kishte gjetur në shtëpi. Aksidenti ka ndodhur mbrëmë vonë ndërsa trupi i shqiptarit është gjetur sot në mëngjes.

Drejtuesi i makinës pasi ka goditur këmbësorin shqiptar, ka dalë nga rrugë dukë lënë disa pjesë të makinës në vendngjarje. Më pas, drejtuesi i “Peugeot-it”, ka mundur të rifutet në rrugë duke u larguar. Policia thotë se, po punon për gjetjen e drejtuesit të makinës “Peugeot”, që shkaktoi aksidentin fatal.