Itali: Arrestohen tre shqiptarë për grabitje të dhunshme ndaj një çifti të moshuar

Policia italiane ka vënë në pranga tre shtetas shqiptarë, të dyshuar për një grabitje të dhunshme në Padova. Ngjarja ndodhi më 10 gusht, kur tre persona të maskuar hynë në banesën e një çifti të moshuar. Pronari i shtëpisë, 70 vjeç, u sulmua brutalisht me levë dhe u shkelmua pasi ra përtokë.

Grabitësit morën telefona celularë dhe sende me vlerë, ndërsa nuk arritën të hapnin një kasafortë. Pas hetimeve të shpejta, policia identifikoi dhe arrestoi autorët. Në banesën e tyre u gjetën çanta, bizhuteri, 15 mijë euro cash si dhe mjetet e përdorura gjatë grabitjes: levë, doreza, radio dore dhe kaçavida.

Hetimet kanë zbuluar edhe dy shqiptarë të tjerë, të moshës 27 dhe 28 vjeç, të cilët sapo kishin hyrë në Itali, të dyshuar se do t’i bashkoheshin grupit për të kryer grabitje të tjera.