Isufi: Institucionet e vendit kanë dështuar, prandaj po i vazhdohet misioni i EULEX-it

Nënkryetari i Aleancës për Ardhmërinë e Kosovës, Ahmet Isufi, ka thënë se partia e tij nuk ka asnjë informatë se nesër do të mbahet një seancë e Kuvendit të Kosovës për të votuar për projektligjin që i vazhdon edhe për dy vjet mandatin misionit të Bashkimit Evropian për sundim të ligjit në Kosovë EULEX.

Ai ka deklaruar se institucionet e vendit nuk kanë qenë në gjendje ta luftojnë krimin e korrupsionin në vend, dhe për këtë arsye po vazhdohet misioni i EULEX-it.

Ai ka thënë në televizionin Rrokum se si parti ende s’kanë qëndrim për nesër, por ka shtuar se porsa ta marrin agjendën, do të dalin me një vendim.

Nënkryetari i AAK-së ka thënë se misioni, si i tillë, po del se nuk ka qenë shumë efektiv.

Ai ka theksuar se edhe veprimi i Serbisë në veriun e Kosovës, ku, sipas tij, po rikonolizohet vendi, tregon më së miri dështimin që po ndodh atje.

Sa i përket ftesës së presidentit Hashim Thaçi për Asociacionin, ai ka thënë se ajo çështje tashmë është e vdekur, duke shtuar se s’ka nevojë të shkohet në bisedime me një dokument qe e ka rrëzuar edhe Gjykata Kushtetuese me 23 nene.

Sipas Isufit, koalicioni nuk i ka numrat, ndryshe moti do ta kishte sjellë Demarkacionin për votim në Kuvend.

Duke folur për rikthimin e Lëvizjes Vetëvendosje në Kuvend, Ahmeti ka thënë se ai është i çuditshëm, por se VV-ja i di më së miri punët e saj.