Ismet Tafili jep dorëheqje nga “Vatra”

Gjilan – Duke pasur parasysh se me këto veprime mua po më duket se po i humbet imazhi i “Vatrës”, unë Ismet Tafili jap dorëheqje nga të gjitha strukturat e lëvizjes Vatra.

Duke pasur parasysh se disa herë nuk është respektuar demokracia, morali e dinjiteti njerëzorë në Vatër. Duke pasur parasysh se asnjëherë nuk arritëm te konsolidohemi si e sa duhet, duke pasur parasysh se nuk arritëm të unifikojmë qytetarët e ndjekur e të shpërngulur nga Kosova Lindore, përkatësisht nga fshatrat e Malësisë se Bujanocit (kjo më së miri u pa nga zgjedhjet lokale të vitit 2013, kur arritëm të grumbullojmë vetëm 1600 vota nga ai numër i madh i banoreve që gjenden në Gjilan, Fushë Kosovë, Prishtinë e gjetiu në Kosovë).

Duke u bërë gabime që nuk është dashur të bëhen si në fushën e organizimit e të informimit.

Duke pasur parasysh se disa paraqitje në media të shkruara e elektronike të individëve të caktuar kanë qenë kontradiktore me qëllimin, misionin dhe rrugën e “Vatrës”.

Duke pasur parasysh se disa herë nuk është respektuar hierarkia dhe nuk është konsultuar struktura e “Vatrës”, por ka pasur paraqitje në media të shkruara e elektronike nga individë vetëm sa për t’u dukur e sa për të qenë prezentë, e shpesh duke e demantuar deklaratën apo paraqitjen e mëparshme.

Duke pasur parasysh se janë bërë veprime nga individë te papërgjegjshëm pa u konsultuar me anëtare të kryesisë.

Duke u marrë vendime që kanë qenë në kundërshtim me statusin e lëvizjes Vatra.

Duke pasur parasysh se edhe unë ndonjëherë nuk kam mundur të ndikojë në orientimin e drejtë e si është më së miri qëllimin e “Vatrës”.

Duke pasur parasysh se jam i ngarkuar me punë tjera, edhe personale dhe nuk po mundem ta jap kontributin tim sa duhet.

Duke pasur parasysh se me këto veprime mua po më duket se po i humbet imazhi i “Vatrës”, unë Ismet Tafili jap dorëheqje nga të gjitha strukturat e lëvizjes Vatra.

Megjithatë, konsideroj se, gjithë çka kam ditur e mundur nuk jam kursyer për të kryer obligimin në shoqatën Vatra e më vonë të shndërruar në Lëvizje (parti) që nga themelimi i saj në vitin 2005.

Besoj se ka njerëz që janë të mirë e punëtorë, por ata duhet hulumtuar, afruar, e me ta duhet të sillemi si vëllezër, duke mos i nënçmuar e injoruar, duke i ofruar e duke i gjetur njerëzit që e donë vendin, shtetin e bashkimin.

Megjithatë, në lejimin e mundësive, do të vazhdojë të kontribuojë për zgjidhjen e problemeve të vendit e të qytetarëve shqiptarë ka thënë Tafili./rajonipress/