Ismet Beqiri: Ka 1001 arsye për të protestuar, por jo me dhunë

Kryetari i Grupit Parlamentar të LDK-së, Ismet Beqiri, ka thënë se edhe ai i konsideron fyese deklaratat e ministrit serb Jabllanoviq, por zgjidhjen e sheh vetëm në Kuvend, e jo me protesta të dhunshme.

Beqiri pas mbledhjes së Kryesisë së Kuvendit ka thënë se në Kosovë ka një mijë e një arsye për të protestuar, mirëpo jo që kjo e drejtë të shndërrohet në dhunë.
Sa i përket moscaktimit të interpelancës për ditën e martë (një ditë para protestës së ardhshme) që kryeministri t’u përgjigjet pyetjeve të deputetëve për dorëheqjen e ministrit Jabllanoviq, ai tha se kjo do të ishte shmangie. Ndërsa këtë kompetencë e ka vetëm presidentja, kryeministri dhe nënshkrimet e 40 deputetëve.

“Në Kosovë janë 1001 arsye për të protestuar, por as një të vetme arsye nuk e kemi që të përdoret në to dhunë, e të ketë lëndime. Këtë asnjë subjekt politik nuk mund ta arsyetojë”.

“Edhe unë bëj pjesë në grupin e atyre që e konsideron shumë të pamatur, të paqëndrueshëm dhe të pa drejtë pse jo edhe fyese deklaratën e Jabllanoviqit. Por zgjidhjen për këtë e shoh vetëm në Kuvend”, tha ai.

Sa i përket Trepçës, Beqiri ka thënë se ky problem nuk ka lindur sot. Por, siç kujton ai, ka qenë Grupi Parlamentar i LDK-së që ka iniciuar nxjerrjen e një rezolute për Trepçën mandatin e kaluar.

“Grupi Parlamentar i LDK-së ka qenë ai që ka kërkuar dhe kemi nxjerrë një rezolutë për Trepçën mandatin e kaluar, ku është kërkuar një ligj i veçantë për të, që tash i dëgjoni disa të tjerë që as s’e kanë pasur në mend as s’e kanë biseduar këtë punë. Prandaj, nuk qëndroj ajo se ne s’jemi të interesuar”, tha Beqiri.